“Shurtan gaz kimyo majmuasi” MCHJda ishlab chiqarish barqarorligi va istiqboldagi vazifalar o‘rganildi
O‘zbekiston Respublikasi Prezidenti Administratsiyasi vakili hamda “O‘zbekneftgaz” AJ Boshqaruv Raisining qayta ishlash bo‘yicha o‘rinbosari boshchiligidagi ishchi guruh “Shurtan gaz kimyo majmuasi” MCHJga tashrif buyurib, korxona faoliyati, ishlab chiqarish jarayonlarining doimiy barqaror ishlashini ta’minlash borasida olib borilayotgan ishlar bilan yaqindan tanishdi.
Tashrif davomida majmuaning uzluksiz va barqaror faoliyat yuritishini ta’minlashga qaratilgan chora-tadbirlar holati atroflicha o‘rganildi. Xususan, texnologik jarayonlarning samaradorligini oshirish, ishlab chiqarish quvvatlaridan oqilona va samarali foydalanish, energiya resurslarini tejash hamda ishlab chiqarish jarayonlarining izchil ishlashini ta’minlash bo‘yicha olib borilayotgan ishlar joyida ko‘zdan kechirildi.
Shuningdek, joriy yilning birinchi choragi yakunlari bo‘yicha korxona faoliyati natijalari muhokama qilindi. Ishlab chiqarish ko‘rsatkichlari, mahsulot hajmi, moliyaviy natijalar hamda boshqa muhim yo‘nalishlar kesimida amalga oshirilgan ishlar tahlil etilib, erishilgan natijalar va mavjud holat yuzasidan fikr almashildi. Mazkur tahlillar asosida ayrim yo‘nalishlarda ish samaradorligini oshirish imkoniyatlari ham ko‘rib chiqildi.
Tashrif doirasida may oyida rejalashtirilayotgan joriy ta’mirlash ishlariga tayyorgarlik holati alohida o‘rganildi. Ta’mirlash ishlarini sifatli tashkil etish, belgilangan muddatlarda yakunlash hamda bu jarayonning ishlab chiqarish uzluksizligiga ta’sirini kamaytirish bo‘yicha amalga oshirilayotgan tayyorgarlik ishlari yuzasidan ma’lumotlar berildi. Bundan tashqari, ushbu yo‘nalishda mavjud yondashuvlar muhokama qilinib, tegishli tavsiyalar bildirildi.
Bundan tashqari, korxonada raqamlashtirish jarayonlari, zamonaviy axborot texnologiyalaridan foydalanish darajasi hamda ishlab chiqarish jarayonlarini boshqarishdagi amaliy yondashuvlar yuzasidan fikr almashildi. Mazkur yo‘nalishdagi mavjud ishlar ko‘rib chiqilib, ularning samaradorligini oshirishga qaratilgan takliflar ilgari surildi.
Uchrashuv yakunida joriy yilning birinchi yarim yilligi uchun belgilangan reja ko‘rsatkichlarini bajarish, ishlab chiqarish samaradorligini oshirib borish hamda korxona faoliyatini yanada takomillashtirish masalalari yuzasidan fikr almashildi.
Mazkur tashrif korxonada amalga oshirilayotgan ishlar holatini bevosita joyida o‘rganish, mavjud tajribani tahlil qilish hamda kelgusidagi ustuvor vazifalarni aniq belgilashda muhim ahamiyat kasb etdi.