Сурхондарё вилояти депутатлари "Шўртан газ кимё мажмуаси" МЧЖ фаолияти билан танишишди
Қашқадарё вилояти Ғузор туманига тажриба алмашиш мақсадида келган Сурхондарё вилояти депутатларидан иборат делегация “Шўртан газ кимё мажмуаси” МЧЖда бўлди.
Дастлаб, делегация аъзолари учун мажмуа мутахассислари томонидан корхона фаолияти, ютуқлари ва келажакдаги режалари ҳақида тақдимот ўтказилди.
Шундан сўнг, делегация аъзолари корхона бўйлаб экскурсияга таклиф этилди. Экскурсия давомида делегация аъзолари мажмуанинг ишлаб чиқариш фаолияти ва амалга оширилаётган модернизация лойиҳалари билан яқиндан танишишди.
Ташриф доирасида делегация аъзолари мажмуа тарихи музейида ҳам бўлишди. Делегация аъзолари музейдаги корхонанинг ташкил этилиш тарихи, ривожланиш босқичлари ҳамда эришилган ютуқлари ҳақида сўзловчи экспонатларни катта қизиқиш билан томоша қилишди ва корхонанинг ривожланиш тарихи ҳақида батафсил маълумотларга эга бўлишди.
Ташриф давомида олинган маълумотлар делегация аъзоларига корхонанинг фаолияти ва ривожланиш истиқболлари ҳақида тўлиқ тасаввур ҳосил қилишга ёрдам берди. Сурхондарё вилояти депутатлари корхонанинг ютуқларини юқори баҳолаб, корхона жамоасининг келажакдаги режаларига муваффақиятлар тиладилар.