"Шўртан газ кимё мажмуаси" МЧЖда режалаштирилган жорий таъмирлаш ишлари бошланди
Жорий йилнинг октябрь ойида "Шўртан газ кимё мажмуаси" МЧЖда технологик жараёнларнинг операцион самарадорлиги ва ишончлилигини ошириш, шунингдек, "Ўзбекнефтгаз" акциядорлик жамиятининг алоҳида муҳим объектларининг барқарор ишлашини таъминлаш ҳамда куз-қиш мавсумида республика аҳолиси ва иқтисодиёт тармоқларини углеводород хомашёси ва маҳсулотлари билан узлуксиз таъминлаш мақсадида мажмуа технологик қурилмалари тўлиқ тўхтатилган ҳолда олиб бориладиган профилактик таъмирлаш ва модернизация ишларини амалга ошириш режалаштирилган эди.
Айни вақтда, режали жорий таъмирлаш ишларини амалга ошириш мақсадида қабул қилинаётган газ сарфи босқичма-босқич қисқартирилиб, технологик қурилма ва жиҳозларда таъмирлаш ишлари бошлаб юборилди.
Ушбу профилактик таъмирлаш ишларида амалга оширилиши лозим бўлган жами 1368 та иш учун камчиликлар қайдномалари ҳамда таъмирлаш учун зарур ҳужжатлар тайёрланиб, рўйхатдан ўтказилган ва бош мутахассислар томонидан тасдиқланган.
- Этилен ишлаб чиқариш цехида – 244 та;
- Полиэтилен ишлаб чиқариш цехида – 210 та;
- Буғ газ ҳаво таъминоти цехида – 131 та;
- Назорат ўлчов асбоблари ва автоматика цехида – 477 та;
- Электр таъминоти цехида – 249 та;
- Тайёр маҳсулотлар ва хомашё цехида – 9 та;
- Ички сув таъминоти цехида – 40 та;
- Ташқи сув таъминоти цехида – 3 та;
- Оқова сувларни тозалаш цехида – 4 та;
- Метрология хизматида – 1 та банддан иборат техник кўрик ва диагностикадан ўтказиш, таъмирлаш ҳамда модернизация ишлари режалаштирилган.
Шунингдек, камчиликлар қайдномалари асосида профилактик таъмирлаш ишлари вақтида бажариладиган ишлар рўйхати, тармоқ жадвали ҳамда таъмирлаш жараёнида зарур бўладиган материал-техник ресурслар, асбоб-ускуналар ва махсус техникалар рўйхати шакллантирилган.
Бундан ташқари, жорий йилги таъмирлаш ишлари жараёнида мажмуа технологик қурилмалари тўхтаган вақтда қуйидаги асосий таъмирлаш ва модернизация ишларини бажариш режалаштирилган:
- Этилен ишлаб чиқариш цехидаги газларни ажратиш қурилмасида FF-1801B, FF-1801C қуритгичларидаги молекуляр сито (4Å) ҳамда FF-1201A қуритгичидаги молекуляр сито (3Å) ларни янгисига алмаштириш;
- Этилен ишлаб чиқариш цехидаги EA-1809, EA-1201, EA-1204, EA-1206 ҳамда EA-1216 иссиқлик алмашинув аппаратларининг қувурлар боғламини янгисига алмаштириш;
- Этилен ишлаб чиқариш цехидаги BA-1102 пиролиз печининг радиант қисмида ўрнатилган радиант қувурларни тўлиқ янгисига алмаштириш;
- Тайёр маҳсулотлар ва хомашё цехининг автоматик бошқарув тизимини ҳамда PA-7201 дизель генератор қурилмасининг автоматик бошқарув тизимини модернизация қилиш.
Таъмирлаш ишларини ўз вақтида ва сифатли бажариш учун маҳаллий корхоналар мутахассислари билан бир қаторда “SIEMENS Energy” (Швеция), “Flowserve” (Германия), “Mitsubishi” (Япония), “Simax” (Қозоғистон), “Kuhse Power Solutions GmbH” (Германия), “Teknokon Endüstriyel Proses Kontrol Sistemleri Tic. A.Ş” (Туркия) компанияларидан чақирилган мутахассислар ҳам иштирок этиши кўзда тутилган.
Таъкидлаш жоизки, режали жорий таъмирлаш ишлари ва модернизация лойиҳаларини амалга ошириш келгусида ишлаб чиқариш жараёнларида вужудга келиши мумкин бўлган нохуш ҳолатларнинг олдини олиш, шунингдек, технологик қурилма ва ускуналарнинг узоқ муддат сифатли ҳамда самарали ишлашини таъминлашга хизмат қилади.