“Шўртан газ кимё мажмуаси” МЧЖда энергия самарадорлигини ошириш бўйича тизимли ишлар давом этмоқда
“Шўртан газ кимё мажмуаси” МЧЖда 2025 йил учун ишлаб чиқилган ёқилғи-энергетик ресурсларни тежаш чора-тадбирлари доирасида энергия ресурсларидан самарали ва оқилона фойдаланиш, қайта тикланувчи энергия манбаларини жорий этишга қаратилган мақсадли ишлар изчиллик билан амалга оширилмоқда.
Жумладан, 2025 йилнинг январь–июнь ойлари учун электр энергиясини тежаш режаси 3,917 миллион кВт*соат этиб белгиланган бўлиб, амалда 4,706 миллион кВт*соат электр энергияси тежалди. Бу натижа режага нисбатан 120 % ни ташкил этди. Ушбу тежамкорлик, асосан, технологияларни модернизация ва реконструкция қилиш, қуёш фотоэлектр станциясилари ва бошқа энергия тежовчи ускуналарни жорий этиш ҳамда ходимлар орасида энергия тежамкорлик бўйича билим ва кўникмаларни мустаҳкамлаш мақсадида олиб борилган тарғибот ишлари ҳисобидан таъминланди.
Табиий газни тежаш бўйича эса 6 ойлик режа 3,545 миллион м³ни ташкил этган бўлиб, амалда 3,561 миллион м³ газ иқтисод қилинди. Натижада, ушбу кўрсаткич режага нисбатан 101 % ни ташкил этди.
Маълумот ўрнида шуни таъкидлаб ўтиш жоизки, корхона 2024 йилда ҳам ўз олдига қўйган ёқилғи-энергетика ресурсларини тежашга қаратилган режасини тўлиқ бажарган. Хусусан:
- Электр энергиясини тежаш бўйича йиллик режа 8,106 млн кВт*соатни ташкил этган бўлса, амалда 8,204 млн кВт*соат тежалган ва режа 101 % га бажарилган.
- Ёқилғи газини тежаш (СНИПни камайтириш) бўйича эса режа 5,417 млн м³ни ташкил этган, амалда 5,884 млн м³ тежалган — режа 109 % га бажарилган.
Шунингдек, 2023–2025 йиллар давомида мажмуага қарашли объектларда жами қуввати 5 259 кВт бўлган қуёш фотоэлектр станциялари (ҚФЭС) ўрнатилди. Бундан ташқари, 2015–2024 йиллар давомида мажмуага қарашли объектларда жами 20 та гелиоколлектор ўрнатилди, уларнинг умумий сув сиғими 3500 литрни ташкил этади. Жорий йилнинг ўзида эса “Эркатой-1, 2, 3, 4” мактабгача таълим муассасаларига яна 20 та 200 литрли гелиоколлектор ўрнатилиб, уларнинг умумий қуввати 4000 литрни ташкил этади.
Қайд этилган рақамлар шуни кўрсатадики, олиб борилаётган мақсадли ишлар натижасида мажмуада нафақат технологияларни модернизация ва реконструкция қилиш, балки қайта тикланувчи энергия манбаларини кенг жорий этишга ҳам алоҳида эътибор қаратилмоқда. Бу кўрсаткичлар корхонада энергия ресурслардан самарали ва оқилона фойдаланиш тизимли йўлга қўйилганидан далолат беради.