Хоразмлик ёшлар шиддатли ва муросасиз мусобақада куч синашди
Урганч гарнизонидаги ҳарбий қисмларнинг бири ҳамда Ёшлар марказида Шимоли-ғарбий ҳарбий округ қўшинлари қўмондонлиги, Хоразм вилояти Мудофаа ишлари бошқармаси, Ўзбекистон ёшлар иттифоқи ва Ёшлар ишлари агентлиги вилоят кенгаши, Ўзбекистон Республикаси мудофаасига кўмаклашувчи “Ватанпарвар” ташкилоти вилоят кенгаши ҳамда Урганч ҳарбий прокуратураси билан ҳамкорликда “Ватан таянчи” отрядлари аъзолари иштирокида Ўзбекистон Республикаси мудофаа вазирининг кубоги учун “Ватанпарварлар” ҳарбий-спорт мусобақасининг Хоразм вилояти босқичи ўтказилди.
Таъкидлаш жоизки, 2021 йилдан бошлаб март-май ойларида мамлакатимиздаги барча умумий ўрта таълим мактабларининг “Ватан таянчи” отрядлари аъзолари ўртасида ўтказилаётган мазкур мусобақа минглаб ёшларни бирлаштириб, уларга куч ва билим синашиши учун ҳақиқий баҳс майдонига айланди.
Мусобақада 11 та туман ҳамда Урганч ва Хива шаҳар босқичида ғолиб бўлган мактабларнинг юқори синфларида таҳсил олаётган ўқувчиларидан иборат жами 13 та жамоа шиддатли баҳсларда ўзаро куч синашди.
Мусобақа низомига кўра беллашувда ҳар жамоадан 7 нафар ўғил ва 3 нафар қиз болалар иштирок этишига рухсат берилган. Ҳарбий-спорт мусобақасининг “Мерганлар беллашуви” деб номланган 1-шартига кўра ёшлар пневматик милтиқдан назорат отиш машқи орқали мерганлик маҳоратини намойиш этиши белгиланган.
“Ҳарбийлаштирилган эстафета” деб номланган 2-шартда иштирокчилар автоматни нотўлиқ қисмларга ажратиши ва йиғиши, газга қарши ниқобни кийиши ва ўқ-дори қутисини кўтариб югуриши керак бўлади. Бу шартда жамоадан 4 нафар иштирокчи қатнашади.
Мусобақанинг 3-шартида (“Жабрланувчига биринчи ёрдам кўрсатиш”) икки нафар иштирокчи маррада ётган шартли жабрланувчига биринчи тез тиббий ёрдам кўрсатади. Шундан сўнг жабрланувчини судраб олиб чиқади. Ушбу шартни холисона баҳолаш мақсадида тиббиёт ходимлари ҳам жалб этилади.
“Турникда тортилиш” ҳамда “орқа билан ётган ҳолатдан танани кўтариш” шартларида иштирокчилар энг кўп натижа қайд этишлари керак бўлди.
“Арқон тортиш” беллашувида ёшлар жамоада бир ёқадан бош чиқариб бирдамликда ишлашни намойиш этиб, кучли рақобатлашишди.
“Сафда қўшиқ айтиш” деб номланган кейинги шартда жамоалар сафда шаҳдам қадамлар билан юриб, ҳарбийча қўшиқларни жонли ижро этиши белгиланган. Мазкур шартни баҳолаш мезонига иштирокчиларнинг ҳарбийча уст-бош кийим русуми, уни саранжом кийиши, ўзини сафда тутиши ҳамда қўшиқни бир маромда куйлаши киради.
“Билимдонлар” деб номланган шартда ўқувчилар 5 тадан саволга жавоб бериши ва уларнинг ҳар бири учун қўшимча балл эгаллаши мумкин бўлади.
“Ватан мадҳи” бадиий-ҳаваскорлик танловида иштирокчилар камида 5 нафардан кам бўлмаган таркибда ўзлари туғилиб ўсган ҳудуди ҳақида қўшиқ тайёрлаб, куйлаб беришлари керак бўлади.
Мусобақа низомига киритилган янги шарт, яъни “Смарт сардор” ихтирочилик танловида иштирокчилар ўзлари ихтиро этган робототехника ёки бошқа замонавий лойиҳаларни тақдим этиши белгиланган.
Ғолиб ва совриндор жамоаларни тақдирлаш маросимида иштирок этганлар ўсиб келаётган ёш авлод учун мамлакатимиз томонидан берилаётган эътибор, уларни ҳарбий-ватанпарварлик руҳида тарбиялаш йўлида амалга оширилаётган салмоқли ишларни эътироф этди. Бу каби мусобақалар ёшларда лидерлик хусусиятларини шакллантириб, улар ўртасида соғлом турмуш тарзини одат қилишга тарғиб этиши билан аҳамиятли эканини таъкидлади.
Якуний натижаларга кўра, барча шартлар бўйича юқори натижа кўрсатган Урганч туманидаги 19-сон мактабнинг “Енгилмаслар” жамоаси шоҳсупанинг учинчи поғонасидан жой олди. Хонқа туманидаги 40-сон мактабнинг “Султон Жалолиддин” жамоасига озгина имконият етмади ва улар фахрли иккинчи ўринга лойиқ деб топилди. Мусобақанинг мутлақ ғолибига эса Қўшкўпир туманидан келган 16-сон мактабнинг “Жалолиддин Мангуберди” жамоаси айланди ва якуний босқичда мудофаа вазири кубогини Хоразмга олиб келиш учун беллашувларда иштирок этиш йўлланмасини қўлга киритди.
Эслатиб ўтамиз, 2024 йилги “Ватанпарварлар” ҳарбий-спорт мусобақасининг Хоразм вилояти босқичи якуни бўйича Хонқа тумани 40-сон мактабнинг “Ватанпарварлар” жамоаси шоҳсупанинг юқори поғонасидан жой олган эди.
Шунингдек, мусобақа низомига кўра иштирокчилар “Энг кучли спортчи”, “Энг яхши мерган”, “Энг яхши билимдон”, “Энг яхши ижрочи” ва “Энг яхши ихтирочи” каби номинациялар бўйича мукофотланди.
Ғолиб ва совриндор жамоалар ташкилотчиларнинг тегишли даражадаги диплом, кубог, медаль, фахрий ёрлиқ ва эсдалик совғалари билан тақдирланди.