റഷ്യയിൽ പെയ്ത നാണയ മഴ
മഴയെന്നാൽ സാധാരണയായി ആകാശത്തുനിന്നും വെള്ളം പെയ്യുന്നതാണ് നാം കണ്ടിട്ടുള്ളത്. എന്നാൽ ചരിത്രത്തിൽ പലയിടങ്ങളിലും മീൻ മഴയും , തവള മഴയും , എന്തിന് 'രക്തമഴ' (Red rain - കേരളത്തിൽ ഉൾപ്പെടെ) വരെ പെയ്തതായി രേഖപ്പെടുത്തിയിട്ടുണ്ട്. എന്നാൽ ഇവയേക്കാളൊക്കെ വിചിത്രവും കൗതുകകരവുമായ ഒന്നാണ് റഷ്യയിൽ നടന്ന 'നാണയ മഴ' അഥവാ Money Rain.1940 ജൂൺ 17-ന് റഷ്യയിലെ ഗോർക്കി (Gorky - ഇപ്പോഴത്തെ നിഷ്നി നാവ്ഗൊറാഡ്) പ്രദേശത്തുള്ള മെഷ്ചെറ എന്ന ഗ്രാമത്തിലാണ് ഈ വിചിത്രമായ സംഭവം നടന്നത്.അന്ന് ഉച്ചകഴിഞ്ഞ് ആകാശത്ത് കാർമേഘങ്ങൾ ഉരുണ്ടുകൂടുകയും ശക്തമായ ഇടിമിന്നലോടുകൂടിയ മഴ ആരംഭിക്കുകയും ചെയ്തു. എന്നാൽ മഴത്തുള്ളികൾക്കൊപ്പം ഗ്രാമവാസികൾക്ക് മുന്നിലേക്ക് ആകാശത്തുനിന്നും വെള്ളി നാണയങ്ങൾ കൂടി വീഴാൻ തുടങ്ങി. ആദ്യം ആർക്കും കാര്യം മനസ്സിലായില്ലെങ്കിലും, പിന്നീട് അത് വെറും മഴയല്ല, മറിച്ച് തനി തങ്കപ്പെട്ട വെള്ളി നാണയങ്ങളാണെന്ന് (Silver Coins) അവർ തിരിച്ചറിഞ്ഞു.ആകാശത്തുനിന്നും വീണത് സാധാരണ നാണയങ്ങളായിരുന്നില്ല. 16-ാം നൂറ്റാണ്ടിലെ, അതായത് ഇവാൻ ദി ടെറിബിൾ എന്ന റഷ്യൻ ഭരണാധികാരിയുടെ കാലഘട്ടത്തിൽ ഉപയോഗിച്ചിരുന്ന പുരാതനമായ വെള്ളി നാണയങ്ങളായിരുന്നു അവ.ഏകദേശം ആയിരത്തോളം നാണയങ്ങളാണ് അന്ന് ഗ്രാമത്തിൽ വീണത്. ഗ്രാമവാസികൾ ആവേശത്തോടെ ഈ നാണയങ്ങൾ ശേഖരിച്ചു. ചരിത്രകാരന്മാരും പുരാവസ്തു ഗവേഷകരും പറയുന്നതനുസരിച്ച്, ആ പ്രദേശത്ത് എവിടെയോ കുഴിച്ചിട്ടിരുന്ന വലിയൊരു നിധിശേഖരമായിരുന്നു ഇതിന് ആധാരം.
ഇതൊരു അത്ഭുതമാണെന്ന് പലരും വിശ്വസിക്കുന്നുണ്ടെങ്കിലും ഇതിന് കൃത്യമായ ഒരു ശാസ്ത്രീയ വിശദീകരണമുണ്ട്.
ശക്തമായ ചുഴലിക്കാറ്റോ ടൊർണാഡോ പോലെയുള്ള കാറ്റോ ആണ് ഈ പ്രതിഭാസത്തിന് പിന്നിൽ. ഭൗമോപരിതലത്തിൽ നിന്നും സാധനങ്ങളെ വലിച്ചെടുത്ത് ഉയർത്താൻ ശേഷിയുള്ള ഇത്തരം കാറ്റുകൾ, മണ്ണിൽ അധികം ആഴത്തിലല്ലാതെ കുഴിച്ചിട്ടിരുന്ന ഒരു നിധികുംഭത്തെ തകർക്കുകയും അതിലെ നാണയങ്ങളെ അന്തരീക്ഷത്തിലേക്ക് വലിച്ചെടുക്കുകയും ചെയ്തു.ഭാരം കുറഞ്ഞ നാണയങ്ങളെ കാറ്റ് കിലോമീറ്ററുകളോളം ദൂരത്തേക്ക് കൊണ്ടുപോവുകയും, കാറ്റിന്റെ ശക്തി കുറഞ്ഞപ്പോൾ അവ മെഷ്ചെറ ഗ്രാമത്തിൽ മഴപോലെ പെയ്തിറങ്ങുകയും ചെയ്തു. മീൻ മഴയ്ക്കും തവള മഴയ്ക്കുമെല്ലാം പിന്നിൽ ഇതേ തത്വം തന്നെയാണ് പ്രവർത്തിക്കുന്നത്. ജലാശയങ്ങളിൽ നിന്നും ചുഴലിക്കാറ്റ് ഇവയെ വലിച്ചെടുത്ത് കരയിൽ കൊണ്ടുവന്ന് വർഷിക്കുകയാണ് ചെയ്യുന്നത്.
റഷ്യയിലെ സംഭവം ഏറ്റവും പ്രശസ്തമാണെങ്കിലും ലോകത്തിന്റെ പല ഭാഗങ്ങളിലും ഇത്തരം 'മണി റെയിൻ' റിപ്പോർട്ട് ചെയ്യപ്പെട്ടിട്ടുണ്ട്:
🪙1957 (ഫ്രാൻസ്): ഫ്രാൻസിലെ ബൂർഗസ് എന്ന സ്ഥലത്ത് ആയിരക്കണക്കിന് ഫ്രാങ്ക് നോട്ടുകൾ ആകാശത്തുനിന്നും വീണിരുന്നു.
🪙1968 (ഇംഗ്ലണ്ട്): കെന്റിലെ ഒരു ഷോപ്പിന് മുന്നിൽ നാണയങ്ങൾ മഴയായി വീണു.
🪙1976 (ജർമ്മനി): പടിഞ്ഞാറൻ ജർമ്മനിയിൽ 2000 മാർക്കുകൾ ആകാശത്തുനിന്നും വീണതായി റിപ്പോർട്ടുകളുണ്ട്.
Credit: ശ്രീജിത്ത് ശ്രീ