ഈ ഗ്രാമത്തില്‍ ചെരുപ്പ് ധരിക്കാന്‍ അനുവാദമില്ല
വ്യത്യസ്ത സംസ്‌കാരങ്ങളും ആചാരങ്ങളും കൊണ്ട് സമ്പന്നമാണ് ഇന്ത്യ. വൈവിധ്യമാര്‍ന്ന ഇത്തരം ആചരാങ്ങളാണ് പലപ്പോഴും ഈ രാജ്യത്തെ ശ്രദ്ധേയമാക്കുന്നത്. ഇന്ത്യയിലെ ആരാധനാലയങ്ങളില്‍ പൊതുവെ ആരും ചെരുപ്പുകള്‍ ഉപയോഗിക്കാറില്ല. പക്ഷെ തമിഴ്‌നാട്ടില്‍ ഒരു ഗ്രാമമുണ്ട് അവിടെ ആരും ചെരുപ്പുകള്‍ ഉപയോഗിക്കാറില്ല. വീടുകളിലും അമ്പലത്തിലും മാത്രമല്ല ആ ഗ്രാമത്തില്‍ നടക്കുമ്പോള്‍ പോലും ആരും ചെരുപ്പുകള്‍ ഉപയോഗിക്കില്ല. കേള്‍ക്കുമ്പോള്‍ അത്ഭുതം തോന്നുമെങ്കിലും സംഗതി സത്യമാണ്.പ്രാഞ്ചിയേട്ടന്‍ ആന്‍ ദ് സേയ്ന്റ്‌സ് എന്ന സിനിമയിലെ പണ്ഡിറ്റ് ദീന്‍ദയാലിനെ പോലെ ഭൂമി ദേവിയെ വേദനിപ്പിക്കാന്‍ ഈ ഗ്രാമവാസികളും തയ്യാറല്ല. തമിഴ്നാട്ടിലെ വനമേഖലയില്‍ സ്ഥിതി ചെയ്യുന്ന ഒരു ചെറിയ ഗ്രാമമാണ് വെള്ളഗാവി ഗ്രാമം. ഇവിടെ, ആരെങ്കിലും ചെരുപ്പ് ധരിച്ചതായി കണ്ടെത്തിയാല്‍, അവര്‍ ശിക്ഷിക്കപ്പെടും. നൂറിലധികം കുടുംബങ്ങള്‍ താമസിക്കുന്ന ഈ ഗ്രാമത്തില്‍ ആരും ചെരുപ്പുകള്‍ ഉപയോഗിക്കില്ല. കല്ലും മുള്ളും നിറഞ്ഞ പാതകളിലൂടെ സഞ്ചരിച്ചാല്‍ മാത്രമേ റോഡുകളില്ലാത്ത ഈ ഗ്രാമത്തിലെത്താന്‍ സാധിക്കൂ.
ഗ്രാമത്തിന്റെ പ്രവേശന കവാടത്തില്‍ തന്നെ സ്ഥിതി ചെയ്യുന്ന വലിയ മരം മുതലാണ് ചെരുപ്പിനുള്ള നിരോധനം ആരംഭിക്കുന്നത്. ഗ്രാമവാസികളുടെ വിശ്വാസത്തിന്റെ ഭാഗമായാണ് ഈ ആചാരം.
തങ്ങളുടെ ഗ്രാമം ദൈവത്തിന്റെ വീടാണെന്നാണ് ഗ്രാമവാസികള്‍ വിശ്വസിക്കുന്നത്, അതിനാല്‍ പുറത്ത് എത്ര ചൂടുണ്ടെങ്കിലും ചെരുപ്പ് ധരിച്ച് ആരെയും കാണാന്‍ കഴിയില്ല. ആരെങ്കിലും ഈ വിശ്വാസത്തിന് എതിരായാല്‍ അവര്‍ക്ക് ദേവി കോപം ഉണ്ടാകുമെന്ന് ആളുകള്‍ വിശ്വസിക്കുന്നു. വേനല്‍കാലത്ത് മുതിര്‍ന്ന ആളുകള്‍ക്ക് മാത്രമാണ് ഈ ആചാരത്തില്‍ ഇളവ് നല്‍കുന്നത്. വീടുകള്‍ക്കിടയിലും മറ്റുമായി 25 അമ്പലങ്ങളാണ് ഈ ഗ്രാമത്തിലുള്ളത്.
മറ്റ് ആവശ്യങ്ങള്‍ക്കായി ചെറിയ ഒരു ചായ കടയും പലചരക്ക് കടയുമാത്രമാണ് ഇവിടെയുള്ളത്. രാത്രി 7 മണിക്ക് ശേഷം ആരെയും വീടിന് പുറത്ത് കാണാന്‍ സാധിക്കില്ല. ഉച്ചത്തില്‍ സംസാരിക്കാനോ ശബ്ദത്തില്‍ പാട് വയ്ക്കാനോ ഈ ഗ്രാമത്തില്‍ അനുവാദമില്ല. ഇത്തരം നിയന്ത്രണങ്ങള്‍ ഉണ്ടെങ്കിലും ഈ ഗ്രാമവാസികളെല്ലാം വളരെ സന്തുഷ്ടരാണ്. ഏകാന്തത തേടുന്ന ആളുകള്‍ക്ക് ഈ ഗ്രാമം ഒരു സ്വര്‍ഗമാണ്, ഓരോ ട്രക്കിംഗ് നടത്തുന്നവരുടെയും സ്വപ്ന സാക്ഷാത്കാരമാണിത്. റോഡ് കണക്റ്റിവിറ്റി ഇല്ലാത്തതിനാല്‍ ട്രെക്കിംഗിലൂടെയാണ് ഗ്രാമത്തിലെത്താനുള്ള വഴി. കുടിലുകളില്‍ താമസിക്കാന്‍ ആഗ്രഹമുള്ളവരാണെങ്കിലും ഈ ഗ്രാമം നിങ്ങള്‍ക്ക് ഇഷ്ടപ്പെട്ടും.