ഗോരോചനം അഥവാ Bezoar
കുതിര, ആട്, പശു, കാള തുടങ്ങിയ മൃഗങ്ങളിലെ പിത്താശയത്തിൽ കാണപ്പെടുന്ന ഒരു തരം കല്ലാണ്‌ ഗോരോചന അല്ലെങ്കിൽ ഗോരോചനം
എന്ന് അറിയപ്പെടുന്നത്‌. സാധാരണയായി രോമത്തിൽ നിന്നോ ദഹിക്കാതെ കിടക്കുന്ന സസ്യപദാർത്ഥങ്ങളിൽ നിന്നോ മൃഗങ്ങളിൽ തനിയെ രൂപപ്പെടുന്ന വസ്തുവാണിത്‌. ബോവിനം പ്യൂരിഫാക്ടം എന്നാണ് ശാസ്ത്രീയ നാമം. മീസിൽസ്, ശ്വാസമുട്ടലിനുള്ള മരുന്നൊക്കെയായി ഇവ ഉപയോഗപ്പെടുത്തുന്നുണ്ട്.
ഗോരോചനം ഒരു ഔഷധമായി ആയുർവ്വേദത്തിലും പാരമ്പര്യ ചികിത്സാരീതിലും ഇന്നും ഉപയോഗിച്ച്‌ വരുന്നു. പന്ത്രണ്ടാം നൂറ്റാണ്ടിൽ ജീവിച്ചിരുന്ന ഇബ്ൻ ളുഹർ (Ibn Zuhr) എന്ന ലോകപ്രശസ്ത ഭിഷഗ്വരനാണ്‌ കുതിരയിൽ കാണപ്പെടുന്ന ഒരു വസ്തുവിൽ രോഗശമനമുണ്ടെന്ന് തിരിച്ചറിഞ്ഞത്‌. പാശ്‌ചാത്യ ലോകത്ത്‌ Avenzoar എന്ന പേരിൽ അറിയപ്പെടുന്ന ഇദ്ദേഹത്തിന്റെ പേരിൽനിന്ന് തന്നെയാണ്‌ ഈ വസ്തുവിന് Bezoar എന്ന പേർ വന്നിരിക്കുന്നതും. വിഷചികിത്സയിൽ ഗോരോചനത്തിന്റെ ഗുണം മനസ്സിലാക്കി ഉപയോഗിക്കാൻ തുടങ്ങിയതും ഇദ്ദേഹമാണ്‌.
പശുക്കളിലും കാളകളിലും പിത്താശയ കല്ലുകൾ രൂപപ്പെടുന്നത് ഒരു ആരോഗ്യ പ്രശ്നമാണെങ്കിലും അറവിനായി വാങ്ങിക്കുന്നവർക്ക് ഇത് ലഭിച്ചാല് നേട്ടമാണ്. ഗ്രാമിന് 1200 രൂപയോളം ഇതിന് വിലയുണ്ടത്രെ. ആട്മാടുകളെ അറുത്ത ശേഷം പിത്താശയം കൈ കൊണ്ടമർത്തി ഗോരോചനം ഉണ്ടോയെന്ന് കശാപ്പുകാർ പരിശോധിക്കാറുണ്ട്. ആയിരത്തിലൊന്നിന് മാത്രേ ഇത്തരം ഗോരോചനം കാണപ്പെടാറുള്ളൂ എന്നാണ് ഈ മേഖലയിലുള്ളവർ പറയുന്നത്. വിൽക്കാനും വാങ്ങാനും നിയമ തടസ്സമില്ലാത്ത ഇവ കൂടുതലും യു പി യിലേക്കാണ് കൊണ്ട് പോകുന്നത്.
ഗോരോചനം വിവിധ തരത്തിലുണ്ട്‌. കുതിരയിലെ അന്നനാളത്തിൽ രൂപപ്പെടുന്ന ചോക്‌ എന്നറിയപ്പെടുന്ന ഒരു തരം ഗോരോചനമുണ്ട്‌. വൻകുടലിൽ അടിഞ്ഞ്‌ കൂടി രൂപപ്പെടുന്ന ഗോരോചനം fecalith എന്നറിയപ്പെടുന്നു. ശ്വാസനാളത്തിൽ കാണപ്പെടുന്നത്‌ tracheabezoar എന്നും വിളിക്കപ്പെടുന്നു.