ഫ്ലോറിഡയിൽ 5,000 ഇഗ്വാനകളെ ദയാവധത്തിന് വിധേയമാക്കി
അമേരിക്കയിലെ ഫ്ലോറിഡയിൽ ഉണ്ടായ അസാധാരണമായ ശൈത്യതരംഗത്തിൽ മരവിച്ചു വീണ 5,000-ത്തിലധികം ഇഗ്വാനകളെ അധികൃതർ ദയാവധത്തിന് വിധേയമാക്കി. തെക്കൻ ഫ്ലോറിഡയിൽ താപനില കുത്തനെ കുറഞ്ഞതിനെത്തുടർന്ന് മരങ്ങളിൽ നിന്ന് താഴെ വീണ അധിനിവേശ ഇനത്തിൽപ്പെട്ട ഇഴജന്തുക്കളെയാണ് കൊന്നൊടുക്കിയത്.
ഫ്ലോറിഡ ഫിഷ് ആൻഡ് വൈൽഡ് ലൈഫ് കൺസർവേഷൻ കമ്മീഷനാണ് (FWC) ഇത് സംബന്ധിച്ച വിവരങ്ങൾ പുറത്തുവിട്ടത്.ഫ്ലോറിഡയിൽ താപനില 40 ഡിഗ്രി ഫാരൻഹീറ്റിൽ (ഏകദേശം 4°C - 7°C) താഴേക്ക് എത്തിയതോടെയാണ് ഉഷ്ണമേഖലാ പ്രദേശങ്ങളിൽ കണ്ടുവരുന്ന ഇഗ്വാനകൾ 'കോൾഡ്-സ്റ്റൺഡ്' അവസ്ഥയിലായത്.ഈ അവസ്ഥയിൽ അവയ്ക്ക് അനങ്ങാനോ ഭക്ഷണം കഴിക്കാനോ സാധിക്കില്ല. മരങ്ങളിൽ വസിക്കുന്ന ഇവ തണുപ്പ് സഹിക്കാനാവാതെ മരവിച്ച് താഴേക്ക് വീഴുകയായിരുന്നു.ഇഗ്വാനകൾ ഫ്ലോറിഡയിലെ തദ്ദേശീയ ജീവികളല്ല. ഇവയുടെ പെരുകൽ അവിടുത്തെ പരിസ്ഥിതിക്കും അടിസ്ഥാന സൗകര്യങ്ങൾക്കും വലിയ നാശനഷ്ടങ്ങൾ ഉണ്ടാക്കുന്നതായി അധികൃതർ പറയുന്നു.തണുപ്പിൽ മരവിച്ചു കിടക്കുന്ന ഇഗ്വാനകളെ പിടികൂടി പ്രത്യേക കേന്ദ്രങ്ങളിൽ എത്തിക്കാൻ അധികൃതർ പൊതുജനങ്ങളോട് ആവശ്യപ്പെട്ടിരുന്നു. തുടർന്ന് പിടികൂടിയ ഇഗ്വാനകളെ മാനുഷികമായ രീതിയിൽ ദയാവധത്തിന് വിധേയമാക്കുകയായിരുന്നു.ഫ്ലോറിഡയിലെ കൃഷിയിടങ്ങളിലും പാർപ്പിട മേഖലകളിലും ഇഗ്വാനകൾ വലിയ ഭീഷണിയാണ് ഉയർത്തുന്നത്. ഇതിനാലാണ് ശൈത്യകാലം മുതലെടുത്ത് ഇവയുടെ എണ്ണം കുറയ്ക്കാൻ കമ്മീഷൻ തീരുമാനിച്ചത്.
Credit: ശ്രീജിത്ത് ശ്രീ