СЕНГА ҒОЙИБОНА ИШҚ БИЛАН ЎСДИМ

* * *

Қуёш аста қўяр уфққа бошин,

Унингсиз осмон ҳам туюлар мунгли.

Борлиқда бир гўзал тароват ҳоким,

Бирдан титраб кетар шоирнинг кўнгли.

Менинг ҳам ёш қалбим ошуфта, сармаст,

Гўёки учаман булутлар аро.

Осмонга бўй чўзган тоғлар мендан паст,

Мени чорлаганда бағрига само.

* * *

Мавж урган боғларнинг устидан алвон

Рангларини чаплар рассом табиат.

Қонга чўмилгандек кўринар ҳарён

Содир бўлган гўё машъум жиноят.

Яширинар қотил қуёш нурлари,

Аста-секин бошлар қидирувни ой.

Бироқ уни топиб бўлмайди сира

Қуёш из қолдирмай кетган, ҳойнаҳой.

Ҳақиқатни ҳеч ҳам англамайди у,

Ўрнини бўшатар яна қуёшга.

У тағин боғларнинг бағрин тўлдирар

Аламли, оловли, қонли кўзёшга.

Жабрдийда куз-чи, бош эгар маҳзун,

Кўргани чоғ менинг дардли кўзимни.

Тинмай шеър ўқийман беун, беовоз,

Мезонларга осгим келар сўзимни.

ҲАҚИҚАТ

Сени севдим Қодирий каби,

Сўнгсиз душманларинг менга ҳам душман.

Сен мангу ёнимда бўлсанг агарда,

Осмонни ҳеч кимга бермас бир қушман.

Ошноларим ичра вафосиз ҳамда

Мен учун ҳаводек керакли дўстим!

Исминг Ҳақиқатдир, мен сени кўрмай,

Сенга ғойибона ишқ билан ўсдим.

Дўстим, узоқлашиб кетмагин мендан...

ЖИНОЯТЧИ

Қодирийга дедилар:

–"Қайт, жиноят йўлидан!"

– “Гар ҳақиқатни айтмоқ —

Жиноят, деб саналса,

Майли, жоним қўлингда!"

ШУКРОНАЛИК

Қуёш бойчечакка доялик қилиб,

Уни аста олар қорнинг бағридан.

Бойчечак бошини кўтарар шодон

Оппоқ кўрпасининг иссиқ қаъридан.

Бобомнинг қабарган бармоқлари ҳам

Шундайин кунларга айтар шукрона.

Унинг-да, бу йилни соғ кўргани-чун

Юзларида қувонч ўтлари ёнар.

Ҳикматбек БОЙҚОБИЛОВ,

Абдулла Орипов номидагиижод мактабининг 8-синф ўқувчиси