TANAFFUS DARSI

OSON DARS

“Nolinchi” sinfda

O‘qiydi Jamol.

Qiziqib, unga

Berdim bir savol:

– Maktabda darsning

Osoni qaysi?

Deydi: “Eng osoni –

Tanaffus darsi”.

MISI CHIQDI

– Yuzingni yuvib

Kelgin, jon qizim.

– Yuvdim, oyijon,

Top-toza yuzim.

– Qo‘llaring kir-ku,

Yashirma bizdan.

– Qo‘llarimmi, vo-oy,

Chiqibdi esdan.

QOROVUL

– Ur-re!!!

Yutdik futboldan

Bugun 5-“B”ni, –

Maqtanadi Matqovul

Yig‘olmay lunj-labini.

Xol kiritdi ikkita,

Jasur urdi uchta gol.

O‘tkazmadik bitta ham,

Hisob bo‘ldi beshu nol.

– Xo‘sh, ne qilding sen o‘zing,

Ayt-chi bizga, Matqovul.

– Menmi… o‘yinchilarning

Papkasiga qorovul.

OVCHI

Maqtanadi Alisher:

– Otdim kecha katta sher.

Yana ikkita “paq-puq”,

Qarabsizki ayiq yo‘q.

Qushni oldim mo‘ljalga,

U ham quladi jarga.

Keyin uchta bo‘rini

Quritib xo‘b sho‘rini,

Qirib tashladim birga,

Kecha men kirib…TIRga.

MERGAN AKAM

Mergan akam

Bir o‘q bilan

Qulatadi

To‘ng‘izni.

Ammo qo‘lda

Tutolmaydi

Qo‘rqib, oddiy

Qo‘ng‘izni.

G‘AMXO‘R AKA

G‘olibjon ukasidan

Olar ekan olmasin,

Deydi: – Ma, kichikrog‘i,

Qo‘ling tolib qolmasin.

Xudoyberdi KOMILOV