Эдит Маркуш
(Венгрия)
ҚАРҒАВОЙ ЧЎМИЛГАНДА
Қарғавой чўмилтирди
Митти қарға болани.
Кўзига совун кирди,
У бошлади нолани.
Шунча ювди, кетмади,
Полапоннинг қораси.
Аслида қора эди,
Қарғавойнинг боласи!
Фам Хо
(Вьетнам)
НОДОН ТОЙЧАЛАР
Борарди тош кўчада
Ота от мамнун,
Янги тақа туёқдан
Сочарди учқун.
Буни кўриб тойчалар
Кўтарди қий-чув:
–Туёғингиз ёнмоқда,
Келтирайлик сув!
Робер Деснос
(Франция)
ЧИГИРТКА
Чигирткадан сўрадим:
– Сенда тиним борми ҳеч?
Мудом сакраб юрасан,
Майсазорда эрта-кеч?
Чигиртка деди:
– Билсанг,
Сакрашда бордир унум.
Қанчалик кўп сакрасам,
Шунча тез ўтар куним!
Роберт Грейвз
(Англия)
ҲЕЧ НАРСА
Ҳеч нарса – бу ҳеч нарса,
Ҳалқа тутун тешиги.
Яланг, рангсиз деворда
Ҳатто йўқдир эшиги.
Ҳеч нарса – тушунарсиз,
Уни бўлмайди тутиб.
Ҳеч нарса бўлмаганда,
Ўтирма яна кутиб.
Олимлар овутади:
– Ҳеч нарса – бу йўқ нарса!
Йўқ нарсадан умид йўқ,
Оч нарса-ю, тўқ нарса.
Тўғри, олимлар оқил,
Сўзламайди тумтароқ.
Лекин менинг таърифим
Ҳаммасидан пухтароқ!
Альфредо Валлини
(Аргентина)
ОЛТИН БАЛИҚЧА
Биллур жомда паришон,
Сузар олтин балиқча.
Бефарқ боқар, иши йўқ,
Дунё билан тариқча.
Мовий осмон, зилол сой,
Зийнатли куз, кумуш ой,
Унутган ҳаммасини,
Чирилдоқ нағмасини.
Мажнунтоллар ўксинар,
Чирилдоқлар хўрсинар.
Биллур жомда балиқча,
Тинмай айланар гирён.
Ўз эркидан айирган
Биллур жомдаги зиндон.
Китахара Хакусю
(Япония)
ҚИРМИЗИ ҚУШЧА
– Қушча,
Нима гап ўзи,
Нега рангинг қирмизи?
– Қизил мевалар едим.
– Қушча,
Қушча, айт ўртоқ,
Нега бунча рангинг оқ?
– Тутхўрлик қилган эдим.
– Қушча,
Патларинг мовий,
Нега рангинг самовий?
– Осмонни чўқиб едим!
Овсей Дриз
(Исроил)
НИМА, ҚАЕРДА?
Дарахтлар илдизи
Тупроқда пинҳон.
Учқунлар оташи
Гулханда аён.
Мевалар мағзида
Эман баёти,
Тухумда пинҳондир
Бир қуш ҳаёти.
Садафда дур ниҳон,
Анҳорда балиқ.
Нодонлик ҳамиша
Кўринар аниқ!
Рус тилидан Нуруллоҳ ОСТОН таржималари.
