ЎРИКЛИСОЙ ИЛҲОМЛАРИ

ЗОМИН ИСТАГИ

Жиззах заминига киришда бирдан

Қалбларга интиқлик ифорин тарар,

Ўзини кўрсатиб тоғлару қирга

Қуёш ярқирар,

қуёш ярқирар...

Нур эмган майсалар кўкарган томлар

Минг йилки бағрида ўстирар ниҳол.

Мажнунтол сочига боғлар илҳомлар

Жамалак мисол,

жамалак мисол...

Илоҳга лиммо-лим муҳаббат билан

Сойда бу тошларнинг қулоғи сергак,

Бизларга боқишиб хаёлан, дилдан

Дейди: "шеър керак",

дейди: "шеър керак!"

Ситора НАИМЖОНОВА

Сирдарё

ЁНАЁТГАН ТОҒЛАРИГА

Дардмиди ҳарсанглар, гардмиди тоғлар,

Ҳайқирсам, акс-садо берди бирма-бир.

Қачондир, минг йиллар, милён йил аввал

“Тоғларнинг ҳам руҳи енгил бўлгандир”.*

Ўзимча ифода излайман тошиб,

Йиғласам, сел бўлиб кетади ичим.

Шу майда дардлар деб куйиб кетмайин

Менга ҳам юқтиринг тоғ бўлиш кучин.

Бесас яшамоқни ўйлайман кўпроқ

Буюк туйғуларга, дардларга қасам.

Сел бўлиш-ку, майли, ҳеч нарса эмас,

Тоғлар мендан кўпроқ ёнаркан билсам.

*М.Норчаева мисраси

Ҳилола ЖЎРАҚУЛОВА

Самарқанд

ИЗҲОР

Ўрлаган борлиқда сукунат,

Тўлғонар ниҳоллар кокили.

Нигоҳин беркитар зулумот

Кўк кўшкида булут, сепкилли.

Мусофир қушлардан хабарлар,

Олгандек солланар дарахтлар.

Ногоҳ қуёш сочади зарлар,

Зомин менга тилайди бахтлар.

Эртак мисол дунё, гўёки

Хаёл кезиб юрар тоғларда.

Ичимда борини айтайки,

Кетгим йўқ, менинг бу ёқлардан.

Сабина РАСУЛОВА

Бухоро