ЧУМОЛИНИНГ ЎКИНЧИ

ЧУМОЛИНИНГ ЎКИНЧИ

Дон излаб чиқдик, бироқ,

Топганимиз бир увоқ.

Афсуски, товуққа биз

Ўлжа бўлдик ўша чоқ.

ҚИСҚА ЖАВОБ

– Исминг нима?

– Шерали.

– Тилинг бунча

Ширали?

– Кўп бўлмади,

Бўлди сал.

Еган эдим

Мен асал.

Шундандир

Тилим ширин.

Айтиб қўйдим- а,

Сирим.

КИМ ҚЎЙИБДИ

Мушугим болалади,

Тўртта, ночор аҳволи.

Қаранг-ки, мўйлов қўйган,

Хайрият, йўқ соқоли.

Кўзлари кўрмаса-да,

Бари сутга тўйибди.

Қаранг, мўйлов қўйишни,

Уларга ким қўйибди.

МУНОСИБ ЖАВОБ

“Оғзингга қараб гапир”–

деди Раъно Саҳобга.

Саҳоб жуда сўзга бой,

Қулоқ тутинг жавобга:

– Хўп опажон, албатта,

Тушундим сўзингизни.

Менга-чи, бериб туринг,

Қизғанмай кўзгунгизни.

Рўзимурод БОЛҚИЕВ