ҚУВОНЧЛИ ТАДБИРЛАР
Куни кеча мамлакатимизнинг умумтаълим мактабларида 2022 – 2023 ўқув йили якунига бағишланган қувончли тадбирлар бўлиб ўтди. Жумладан, Президент таълим муассасалари агентлигига қарашли Зангиота туманидаги ихтисослашган мактабда ҳам ота-оналар, мактаб жамоаси ҳамда ҳамкор ташкилотлар – Ўзбекистон Республикаси Мудофаа вазирлиги Марказий ҳарбий оркестри жамоаси иштирокида ўтказилган тадбирда “Ўзбекистон адабиёти ва санъати” газетаси таҳририяти ходимлари ҳам қатнашиб, мактаб кутубхонасига бадиий китоблар тақдим этишди.
Тадбир аввалида Зангиота туман ҳокими ўринбосари Саодат Усмонова Ўзбекистон Республикаси Президентининг умумий ўрта таълим мактабларининг битирувчи ёшларига йўллаган табригини ўқиб эшиттирди.
Ўтган ўқув йили якунларига кўра юқори натижаларга эришган ижодкор ўқитувчилар ва билимли ўқувчилар туман ҳокимлиги, Президент таълим муассасалари агентлиги ҳамда мактаб маъмуриятининг фахрий ёрлиқлари, қимматбаҳо совғалари билан тақдирландилар.
– Якунланаётган ўқув йилида фан олимпиадаси вилоят босқичида иштирок этиб физика фанидан Хушмуҳаммедов Абдулатиф, биология фанидан Азмиддинова Шарофатхон биринчи ўринни эгаллади. Шунингдек, математика фанидан иккинчи ўринни олган Ҳабибуллаев Файзулло, физикадан бўйича учинчи ўринга лойиқ топилган Миржалолов Мираббос мактабимизнинг фахрига айландилар. Педагогик жамоамиз ёш, серғайрат ва билимли ўқитувчилардан таркиб топган. Улар мактаб шарафини юқори кўтаришга астойдил бел боғлашган, – дейди мактаб директори Ёрқиной Мирзааҳмедова.