Xurram RAYIMOV* * *
Bola, bola, jon bola,
Orzusi jahon bola.
Keng olamni rom etgan,
Shodmon, bearmon bola.
O‘yin birla banddirsan,
Asaldirsan, qanddirsan,
Jonlarga payvanddirsan,
Bola, bola, sen bola.
Sharqiraysan, soydaysan,
Yoqimlisan, oydaysan.
Nazarimda bugun sen
Gijinglagan toydaysan.
Keng olamga kulib boq,
Qushlar kabi qanot qoq.
Bugun hamma, hammadan
O‘zingdirsan baxtliroq.
Bola, bola, jon bola,
Yuzlari shirmon bola.
Dunyolarning dardiga
Bo‘lguvchi darmon bola.
TOSHCHUMCHUQ
Bu qushning ziynati ko‘p,
G‘ayrati to‘lib-toshar.
Yaqindan taniganlar
Toshchumchuq deb atashar.
Ko‘rinishdan nozik u,
Patlari oqish-oqish.
Tumshuqchasi qop-qora,
Dumi kalta, mitti qush.
Moshdek bir juft ko‘zlari,
Olamga xushnud boqar.
Chug‘ur-chug‘ur sayrashi
Ko‘ngil shamlarin yoqar.
Bu qush shunchalar go‘zal,
Bu qush shunchalar nodir.
Tumshug‘i qattiq juda,
Toshni teshishga qodir.
SAVOL-JAVOB
– Hayotda eng ovqatxo‘r,
Kim bilar, qaysi hayvon?
Shermi, bo‘ri yo yo‘lbars,
Ayting-chi, qay tirik jon?
– Tinglagin, do‘stim Ali,
Ninachi u hoynahoy.
Qirqtalab pashsha har kun,
Qornidan oladi joy.
– Eb to‘ymas aniq bo‘ldi,
Javobing to‘g‘ri, Vali.
Shu bois qoyil qolib,
Aqlingga deymiz, balli!
ILONBALIQ
Na baliqsan, na ilon,
Qaysi turga mansubsan?
Ko‘rinishing g‘alati,
Aytgin, qanday maxluqsan?
Maqsading turli zotlar
Bir vujudda qolishmi?
Hayvonot dunyosida
Yangi dovruq solishmi?
Baliq, to‘rga tushishdan,
Yo cho‘chib qolganmisan?
Ilon, zahar solishdan,
Yo chindan tolganmisan?
XONQIZI
Termulib xonqiziga,
Nigohimiz qadaymiz.
Erkagini qanday qilib,
Shu nom bilan ataymiz.
TILLA QO‘NG‘IZ
Tilla qo‘ng‘iz deydi seni,
Balki tilla emassan.
O‘zgartirsak nomingni,
Misim chiqdi demassan.
MAQTANCHOQ
Uchar shishingan pufak,
Maqtanib keriladi.
Shamolga bo‘lib ermak
Paq etib yoriladi.
Xurram RAYIMOV
