ОЙЛАРНИ УХЛАТДИК ЭРТАКЛАР АЙТИБ

Мансур ХЎЖАЕВ, Фарғона вилояти

* * *

Қарагин, осмон кенг, ер ҳам бепоён,

Мен эса ҳаловат истайман сендан.

Қарагин, сени деб типирлайди жон,

Мен эса муҳаббат излайман сендан.

Чопаман, ҳув парқу булутни қувиб,

Ёмғирга чаяман юзларимни ҳам.

Топмасам, ўзимдан кетарман совуб,

Кўксимга бир роҳат излайман сендан.

Топишдик, суйишдик, дилга тўй бериб,

Айрилмоқ истамас эди-ку кўнгил.

Мен қолдим, узоққа кетдингми учиб,

Кўнгилга саёҳат излайман сендан.

Ойларни ухлатдик эртаклар айтиб,

Қуёшни уйғотдик саҳарлар билан.

Кутаман, биламан, келасан қайтиб,

Яна бир ижозат излайман сендан.

Дунё кенг, кўнглимиз ундан-да теран,

Яна бир гул суҳбат излайман сендан.

Қаршингда гуноҳкор бу қалбим билан,

Туганмас муҳаббат истайман сендан.

* * *

Онажон, тандиринг битди, нонлар ёп,

Юзларинг ял ёнсин чўғлар тафтидан.

Қоракуя теккан, кул чанги теккан,

Кулчалар олайин қайноқ кафтингдан.

Тандирдек ғамларни ёқарсан, она,

Чўғдек меҳринг билан тобладинг бизни.

Ҳар куним, тунимда сенсан парвона,

Нондек азиз билдинг ҳар биримизни.

Оловда қизарган юзларинг мунис,

Оловлар тафтидан қизарган кулча.

Қўлларинг ўпаман, юзинг ўпаман,

Қанча ғам кўрдинг бу кунни кўргунча.

Онажон, тандиринг битди, кулча ёп,

Қуёшдек оламга меҳрлар берсин.

Пойингда пойандоз, бўлсин-а кўксим,

Онажон, кўзларинг доимо кулсин.

* * *

Уринамиз топмоққа висол,

Талпинамиз бир бор кўришга.

Олисларда бўлсак-да алҳол,

Биз ҳақлимиз бахтли бўлишга.

Айланади кунлар безовта,

Ой чиқади, Қуёш айланар,

Кўнглимизда орзумиз битта,

Биз ҳақлимиз бахтли бўлишга.

Кўзларингда соғинчнинг расми,

Кафтларингда титрайди тилак,

Висол истаб энтикар жисминг,

Биз ҳақлимиз бахтли бўлишга.

Термуламан сувратларингга,

Қисматимга тилайман тўзим,

Термуласан сувратларимга,

Биз ҳақлимиз бахтли бўлишга.

Оҳ, кўксимнинг жони, нурлигим,

Олислардан сочарсан зиё,

Сен бордирсан, менинг борлигим,

Биз ҳақлимиз бахтли бўлишга.

Оёғимда қисмат занжири,

Сенинг эса мингта ғаминг бор.

Насиб этса, топармиз бахтни,

Биз ҳақлимиз бахтли бўлишга.

Мансур ХЎЖАЕВ,Фарғона вилояти