Maktab o‘quvchilari va talabalar uchun zavodlarga qiziqarli sayohat
Gʻuzor tumanidagi 68-sonli ixtisoslashtirilgan maktab o‘quvchilari va Toshkent shahridagi Gubkin universiteti talabalari uchun Sho‘rtan gaz kimyo majmuasi va "Uzbekistan GTL" zavodiga ekskursiya tashkil etildi.
Malakali mutaxassislar yoshlarga mamlakatimiz iqtisodiyotida muhim o‘rin tutgan mazkur ikki yirik zavodning o‘ziga xos faoliyati haqida batafsil ma’lumotlar berishdi.
Yuqori texnologiyalarga asoslangan qurilmalar va uskunalar yoshlarda katta qiziqishlar uyg‘otdi va ular o‘zlariga hamrohlik qilayotgan xodimlardan qiziqtirgan barcha savollarga javoblar olishdi.
Ekskursiya davomida neft va gaz sanoatida ko‘p yillar davomida mehnat qilgan tajribali muhandislar, faxriylar va yoshlar o‘rtasida uchrashuv ham o‘tkazildi.
Faxriylar o‘z hayot yo‘llari va soha rivoji uchun qilgan xizmatlari haqida yoshlarga hikoya qilib berishdi. O‘zlari duch kelgan mashaqqatlarni qanday yengib o‘tganlari haqida so‘zlashdi. Yoshlarga qo‘yilgan maqsad yo‘lda uchraydigan har qanday qiyinchiliklarni bilim, intilish, mehnat bilan yengish mumkinligini tushuntirishdi.
Bu kabi ekskursiyalar yoshlarning sanoat va texnika sohalariga qiziqishini oshirib, kelajakda malakali kadrlar bo‘lib yetishishlariga katta hissa qo‘shadi.