Yong‘in va avariyalarga qarshi muvaffaqiyatli sinov
Buxoro neftni qayta ishlash zavodining xavfli ishlab chiqarish obyektlarida yong‘inlar va texnologik hodisalar bilan bog‘liq yuzaga kelishi mumkin bo‘lgan favqulodda vaziyatlarni tezkorlik bilan bartaraf etish bo‘yicha shaxsiy tarkib va avariya xizmatlarining tayyorgarligi sinovdan o‘tkazildi.
Mashq ssenariysiga ko‘ra, suyultirilgan uglevodorod gazi ortilgan vagon sisternasidan chiqqan yong‘in oqibatida sodir bo‘lgan avariyani to‘xtatish choralari ko‘rildi. Qayd etish joizki, yuqori xavfli obyektlar qoidalarga qat’iy rioya qilishni va avariya sodir bo‘lgan taqdirda harakatlarni aniq muvofiqlashtirishni talab qiladi.
Mashg‘ulotlar davomida yong‘in o‘chirish, gazdan qutqarish, texnologik va tibbiy xizmatlarning hamkorlikdagi harakatiga alohida e’tibor qaratildi. Evakuatsiya qilish, yong‘in manbalarini tezkor o‘chirish, yondosh hududlarni himoya qilish va rejali avariya oqibatlarini texnik bartaraf etish algoritmlari ishlab chiqildi.
Taktik-maxsus tadbirlarda jami 254 xodim, 25 ta maxsus texnika, jumladan o‘t o‘chirish mashinalari, gaz-qutqaruv texnikasi, monitoring tizimlari va mobil qo‘mondonlik punktlari safarbar etildi.
Bunday o‘quv mashg‘ulotlari haqiqiy tahdidlar yuzaga kelganda harakatlarni tahlil qilish, mavjud kamchiliklarni aniqlash va favqulodda vaziyatlar yuzaga kelishidan oldin ularni bartaraf etish imkonini beradi.
O‘quv mashg‘ulotlari natijalari xodimlarning yuqori darajadagi tayyorgarligi, bo‘linmalar o‘rtasidagi hamkorlikning izchilligi va samaradorligini ko‘rsatdi. Belgilangan barcha vazifalar xavfsizlik qoidalari va standartlariga rioya qilingan holda to‘liq bajarildi.
