Xitoylik hamkorlar bilan loyihalar muvaffaqiyatli davom etmoqda
Xabaringiz bor, “O‘zbekneftgaz” AJ tabiiy gaz qazib chiqarish barqarorligini ta'minlash va ushbu jarayonni yanada samarali tashkil qilish maqsadida Xitoy Xalq Respublikasining yirik neft-gaz korporatsiyasi “CNPC” bilan qator hamkorlik loyihalarini amalga oshirmoqda. Bu aloqalar nafaqat gaz qazib olish hajmini oshirish, balki ilg‘or texnologiyalarni mamlakatimiz neft-gaz sanoatiga joriy etishni ham o‘z ichiga oladi.
Joriy yilning sentyabr oyida “CNPC” mutaxassislaridan iborat delegatsiya yurtimizga kelib, “O‘zbekneftgaz” AJ mutaxassislari bilan muzokaralar o‘tkazdi.
Uchrashuvlar davomida yangi loyihalar, texnologiyalarni ishlab chiqish va amaliyotda qo‘llash bo‘yicha fikr almashildi. Delegatsiya a'zolari shuningdek, Muborak va Sho‘rtan neft va gaz qazib chiqarish boshqarmalarida ham bo‘lib, qazib olish jarayonlari bilan yaqindan tanishishdi.
Mehmonlar Muborak neft va gaz qazib chiqarish boshqarmasida bo‘lganlarida “Dengizko‘l” gazni dastlabki tayyorlash qurilmasi hamda Siquv kompressor stantsiyasini ko‘zdan kechirdilar.
Xorijliklar gaz quduqlarining holati va texnologiyalari bilan tanishib chiqishdi. Quduq tubidagi texnik quvurlarga yig‘ilib qolayotgan qatlam suvlarini bartaraf qilish uchun plunjer nasoslarini joriy etish bo‘yicha takliflar ham o‘rtaga tashlandi.
Sho‘rtan boshqarmasida esa, 20-sonli gaz yig‘uv joyidagi dastlabki tayyorlash texnologik qurilmalari, kompressor stantsiyasi ko‘rib chiqildi. Ushbu ob'ektlarda elektron tezkor ma'lumot almashinuv tizimlarini joriy qilish orqali gaz qazib chiqarish samaradorligini oshirishga e'tibor qaratildi.
Tomonlar o‘rtasidagi uchrashuvlar samarasida “O‘zbekneftgaz” AJ va “CNPC” kompaniyasi neft va gaz sohasida yangi qo‘shma loyihalarni amalga oshirish bo‘yicha aniq rejalar belgilab olindi. Bu loyihalar nafaqat gaz qazib chiqarish barqarorligini ta'minlash, balki sohadagi innovatsiyalar va ilg‘or texnologiyalarni qo‘llashga ham yo‘naltirilgan.