“O‘zbekneftgaz”: “O‘zbekiston neft va gazi – OGU 2023” 25-yubiley xalqaro ko‘rgazmasi o‘z ishini boshladi
Joriy yilning 18-20 may kunlari Toshkent shahridagi “O‘zekspomarkaz” markaziy ko‘rgazmalar majmuasida “O‘zbekiston neft va gazi – OGU 2023” 25-yubiley xalqaro ko‘rgazmasi hamda O‘zbekiston Respublikasining 3-xalqaro energetika forumi o‘tkaziladi.
Ushbu tadbir 1996 yildan buyon har yili “Iteca Exhibitions” ko‘rgazma kompaniyasi va hamkor “ICA Eurasia LLC” MCHJ bilan birgalikda O‘zbekiston Respublikasi hukumati ko‘magida o‘tkazib kelinmoqda.
Bugungi ko‘rgazmada 300 dan ortiq xorijiy kompaniyalar va xalqaro tashkilotlar OGU-2023 ko‘rgazma va konferensiyasida ishtirok etmoqda.
Jumladan “Gazprom”, “Lukoyl”, “Socar”, “Haldor Topsoe”, “BakerHughes GE”, “Bureau Veritas”, “WorleyParsons”, “Honeywell”, “Indorama”, “Linde AG”, “Gazprombank”, “Tatneft”, “Siemens Energy”, “Huawei”, “Rosen Group”, “Zeppelin International AG”, “Sumitomo Corporation”, “Ernst&Young”, “Zarubejneft”, “TMK”, “Italuz Spa”, “Severstal” AJ, “AspenTech Ltd.”, “Rosatom” DK va boshqalar. Shuni ta’kidlash joizki, ishtirokchilar orasida 40 dan ortiq kompaniyalar tadbir debyutantlaridir.
Forum doirasida III Xalqaro energetika konferensiyasi bo‘lib o‘tmoqda. Unda sanoatni rivojlantirishning dolzarb tendensiyalari keng namoyish etiladi. Ko‘rgazma doirasida yoshlar seminari zonasi faoliyat yuritib, unda yosh olimlar va soha mutaxassislarining innovatsion g‘oyalari muhokamasi va taqdimotlari o‘tkaziladi.
Ko‘rgazmaning tantanali ochilish marosimi 19 may kuni soat 11:00 da “O‘zekspomarkaz” MKM hududidida bo‘lib o‘tadi. Xalqaro konferensiya doirasidagi texnik va panel sessiyalari 20 may kuni soat 09:00 dan 17:00 gacha International Hotel Tashkent mehmonxonasining Amir Temur zalida bo‘lib o‘tadi.
Tadbirning tantanali ochilish marosimi oldidan respublika energetika sohasi xodimlari o‘rtasida “UNG YOUTH MARATHON” yoshlar marafoni, “Zakovat” intellektual o‘yini tashkil etiladi.
Shuningdek, yosh olimlar uchun “Yosh olimlar seminari” tashkil etiladi hamda unda barcha faol yosh olimlar tomonidan neft va gaz sanoati bo‘yicha o‘z ilmiy ishlari natijalari bo‘yicha ma’ruzalar hamda olingan ilmiy natijalari yuzasidan ilmiy-innovatsion ishlar ko‘rgazmasini tashkil etish imkoniyatlari beriladi. Bunga qo‘shimcha ravishda, neft va gaz sohasi bo‘yicha jamoalar o‘rtasida “Keys chempionati” o‘tkaziladi.
Shu bilan birga, tayyorgarlik doirasida nafaqat jahon neft-gaz hamjamiyati, moliya institutlari, balki yoshlar, turli yoshdagi sayyohlar, talabalar, olimlarning yoqilg‘i-energetika sohasiga qiziqishini oshirish bo‘yicha keng ko‘lamli ishlar amalga oshirilmoqda. Kattalar va bolalar o‘rtasida intellektual, ijodiy bellashuvlar, hamda pazandachilik shoulari tashkil etilmoqda.
