Voleybol bo‘yicha ayollar o‘rtasida o‘tkazilgan musobaqa g‘oliblari aniqlandi
Davlatimiz rahbarining “Voleybol sport turlarini yanada rivojlantirish chora-tadbirlari to‘g‘risida”gi qaroriga muvofiq xotin-qizlar o‘rtasida sportni ommalashtirish maqsadida “O‘zbekneftgaz” AJ tomonidan “Voleybol chempionati-2024” musobaqasi tashkil etilgani haqida xabar berilgan edi.
O‘zbekiston Voleybol Federatsiyasi, Oila va Xotin-qizlar qo‘mitasi hamkorligida o‘tkazilgan musobaqada “O‘zbekneftgaz” AJ Markaziy apparati, Jamiyat tasarrufidagi boshqarma va korxonalarda faoliyat olib borayotgan xotin-qizlar ishtirok etdi.
Birinchi hududiy saralash bosqichi Jamiyat tasarrufidagi korxonalarda sentyabr oyida bo‘lib o‘tdi, ikkinchi guruh bosqichi 11-12 oktyabr kunlari guruhlarga bo‘lingan holda Toshkent shahridagi “JAR” sport majmuasida o‘tkazildi.
Musobaqa yakuniga ko‘ra, faxrli birinchi o‘rin yana o‘tgan yilgi musobaqa g‘olibi Muborak gazni qayta ishlash zavodi, ikkinchi o‘rin Sho‘rtan gaz kimyo majmuasi va uchinchi o‘rin Buxoro neftni qayta ishlash zavodi jamoalariga nasib qildi.
Shuningdek, “Eng yaxshi to‘p uzatuvchi” nominatsiyasi bo‘yicha Z.Jo‘rayeva, “Eng yaxshi hujumchi” nominatsiyasi bo‘yicha L.Shomamatova, “Eng yaxshi o‘yinchi” nominatsiyasi bo‘yicha G.Ochilova, “Eng yaxshi texnikasi uchun” V.O‘rinova, "Gʻalabaga bo‘lgan irodasi uchun" A.Jumayeva, "Eng yoshi ulug‘ o‘yinchi" D.Qurbonova, "Eng yaxshi jamoa sardori" N.Mamatova taqdirlandi.
Musobaqa g‘oliblari diplom, kubok hamda qimmatbaho sovg‘alar tantanali tarzda topshirildi.
