Intellektual olimpiadaning yakuniy bosqichi bo‘lib o‘tdi
Qayd etish joizki, davlatimiz rahbari tomonidan bilimli yoshlarga sharoit yaratish borasida ilgari surilgan ko‘plab tashabbuslar ichida “Zakovat” o‘yinlarini ommaviy intellektual harakatga aylantirish asosiy o‘rinlardan birida turadi.
Bilimga chanqoq va intellektual salohiyatli yoshlar davlatimiz va hukumat tomonidan moddiy qo‘llab-quvvatlanmoqda.
“O‘zbekneftgaz” AJda ham kundan kunga yoshlar o‘rtasida yuzaga kelayotgan intellektual muhit o‘zining ijobiy natijasini ko‘rsatmoqda. Jamiyatda tobora ommalashib borayotgan “Zakovat” intellektual o‘yini esa ularni bir joyga jamlash, bilimini namoyon etish va oshirishda muhim ahamiyat kasb etmoqda.
Bugun Toshkent shahridagi “Zakovat Arena” binosida “O‘zbekneftgaz” AJ tizim korxona va tashkilotlari o‘rtasida Intellektual olimpiadaning yakuniy 4-bosqichi “Shaxsiy o‘yin” bo‘lib o‘tdi.
Unda olimpiadaning avvalgi bosqichlari - “Brain ring”, “Zakovat” va “Quiz” o‘yinlarida ishtirok etgan Jamiyatning Markaziy apparati va 29 ta tizim tashkilotidan jamoalar qatnashdi.
Musobaqa natijalariga ko‘ra I-o‘rin "O‘zbekneftgaz"AJ, II-o‘rin Buxoro neftni qayta ishlash zavodi, III-o‘rin “Uz-Kor Gas Chemical” qo‘shma korxonasi jamoalariga nasib etdi.
Gʻoliblar “Ernst & Young” Biznes akademiyasining Ozarbayjon, Qozog‘iston va Toshkentdagi o‘quv markazlarida malaka oshirish imkonini beruvchi sertifikatlar bilan taqdirlandi.
Ma’lumot uchun: “Ernst & Young” Biznes akademiyasi 25 yildan ortiq vaqt davomida mutaxassislarni kasbiy tayyorlash va malakasini oshirish bo‘yicha MDH mamlakatlarida konsalting xizmatlarini ko‘rsatib keladi. Ushbu davr mobaynida turli sohalardagi yetakchi kompaniyalarning 150 mingdan ortiq mutaxassisi ushbu Akademiyada tayyorlangan.