“O‘zbekneftgaz” AJ delegatsiyasi Londondagi “Uzbekistan Investor Day” tadbirida ishtirok etdi
“O‘zbekneftgaz” AJ delegatsiyasi London shahrida "Raiffeisen Bank International" va "Finasia Capital" hamkorligida tashkil etilgan “Uzbekistan Investor Day” tadbirida ishtirok etdi.
Mazkur tadbir O‘zbekistonning yirik tashkilotlari va xalqaro investorlar hamjamiyati o‘rtasidagi doimiy aloqalar va muloqotlarga ko‘maklashish maqsadida tashkil etilgan bo‘lib, tadbir doirasida “O‘zbekneftgaz” AJ delegatsiyasi xalqaro banklar, yetakchi investitsiya tashkilotlari, institutsional investorlar hamda yevroobligatsiya egalari bilan bir qator uchrashuv va muzokaralar o‘tkazdi.
Jumladan, dunyoning yetakchi investitsiya tashkilotlari — "Mesarete Capital, Ashmore", "J.P. Morgan Asset Management", "Finistere, Morgan Stanley Investment Management", "Abrdeen" hamda "Candriam" kabi yirik kompaniya vakillari tadbirda faol ishtirok etishdi.
Uchrashuvlarda Jamiyat vakillari tomonidan kompaniyaning so‘nggi yillarda amalga oshirgan islohotlari, transformatsiya jarayonlari, moliyaviy ko‘rsatkichlari hamda istiqboldagi loyihalari haqida batafsil ma’lumot berildi.
Shu bilan birga, muloqotlar davomida kompaniyaning barqaror rivojlanishi va ESG standartlariga muvofiqlashuvi bo‘yicha ishlar muhokama qilindi.
Bundan tashqari, uglevodorod qazib chiqarishdagi yangicha yondashuvlar hamda xalqaro hamkorlar ishtirokida murakkab zaxiralarni o‘zlashtirishda erishilayotgan natijalar alohida qayd etildi.
Qolaversa, kompaniya vakillari va investorlar o‘rtasida yangi yevroobligatsiya chiqarish rejalari, gaz tariflari, kapital xarajatlarning taqsimlanishi, davlat kafolati va dividend siyosati bo‘yicha ham o‘zaro fikr almashildi.
Tadbir yakunlariga ko‘ra, “O‘zbekneftgaz” AJ bilan xalqaro sarmoyadorlar o‘rtasidagi hamkorlikni yanada rivojlantirish, investisiyaviy faollikni oshirish hamda kompaniyaning jahon moliya bozoridagi imijini yanada mustahkamlashga qaratilgan dastlabki kelishuvlarga erishildi.