Ishda ham, sportda ham lider: Ferangiz Xoshimova jahon kubogi g‘olibi!
2024 yil 24-29 sentyabr kunlari Toshkent shahrida o‘tkazilgan kikboksing bo‘yicha jahon kubogi turnirida Buxoro neftni qayta ishlash zavodi jamoasining faxrli a’zosi, mohir sportchi Xoshimova Ferangiz o‘zining iroda va qat’iyati bilan barchaga namuna bo‘ldi.
U kikboksing bellashuvlarida ishtirok etib, faxrli birinchi o‘rinni qo‘lga kiritdi va mamlakatimiz bayrog‘ini xalqaro maydonda yanada yuksaltirdi.
Uning sport maydonidagi faoliyati, mehnati va sabr-toqati nafaqat kikboksing ixlosmandlari, balki barcha hamkasblar tomonidan katta e’tirofga sazovor bo‘ldi.
Ushbu g‘alabaga erishishda Ferangizga "O‘zbekneftgaz" AJ tomonidan yaratilgan shart-sharoitlar ham katta yordam berdi. Jamiyat tomonidan xodimlarning sport bilan muntazam shug‘ullanishlari uchun barcha imkoniyatlar yaratilgan. Sport inshootlari va sportchilarni qo‘llab-quvvatlash dasturlari samarasida Ferangiz kabi iqtidorli sportchilar o‘z imkoniyatlarini ochmoqda.
Ferangizni ushbu g‘alabasi bilan tabriklab, unga yangi zafarlar tilaymiz. U sportda yanada yuqori marralarni zabt etishiga ishonamiz.