“Bunyodkor” futbolchilari bilan uchrashuv bo‘lib o‘tdi
Xabaringiz bor, sanoqli kunlardan so‘ng superliganing ikkinchi davra o‘yinlari start oladi. Mavsumning birinchi qismini ko‘ngildagidek o‘tkaza olmagan “Bunyodkor” ikkinchi davraga jiddiy ruhda tayyorgarlik ko‘rdi. Tarkib mahalliy va xorijlik futbolchilar bilan kuchaytirildi. Bugun “O‘zbekneftgaz” aksiyadorlik jamiyati Boshqaruv raisi, “Bunyodkor” futbol klubi prezidenti Bahodirjon Sidiqov “Bunyodkor” stadionida jamoa a’zolari bilan uchrashdi. Samimiy ruhda o‘tgan yig‘ilishda jamoaning superliga birinchi davrasidagi ishtiroki tahlil qilindi.
Uchrashuvda “Bunyodkor” jamoasining superliga birinchi davrasidagi ishtiroki qoniqarli darajada bo‘lmagani qayd etildi. Ikkinchi davrada natijalar yaxshi tomonga o‘zgarishi, “Bunyodkor” O‘zbekiston chempionatida yuqori o‘rinlarda yurishga loyiqligi ta’kidlandi.
Rahbariyatning klub a’zolariga bo‘lgan ishonchi futbolchilarga yanada rag‘bat berishi ma’lum qilindi.
Uchrashuv yakunida futbolga xos an’analarga ko‘ra, Klub raisiga “Bunyodkor”ning 12-raqamli ramziy libosi topshirildi.
