Yevropaliklar hamkorligida quvur mahsulotlari mahalliylashtiriladi
“O‘zbekneftgaz” AJ va Yevropaning “EMK STEELTRADE" kompaniyasi o‘rtasida ikki tomonlama uchrashuv o‘tkazildi.
Muzokaralarda kompaniya tomonidan ishlab chiqarilayotgan mahsulotlar bo‘yicha taqdimot bo‘lib o‘tdi. Unda neft va gaz sohasida keng qo‘llaniladigan fitinglar, klapanlar, metall qistirmalar va boshqa quvur mahsulotlari bo‘yicha to‘liq ma’lumotlar berildi.
Ko‘p yillik tajribaga ega “EMK STEELTRADE” metall mahsulotlarini ishlab chiqarish va yetkazib berishga ixtisoslashgan bo‘lib, yuqori sifatli innovasion yechimlar borasida ishonchli hamkor hisoblanadi.
Kompaniyaning Rossiya, O‘zbekiston, Kozog‘iston, Qirg‘iziston, Belarusiya davlatlaridagi hududiy tarmoqlarida “DIN”, “EN”, “ASTM”, “ASME”, “JIS”, “BS”, “ISO”, “GOST” standartlari asosida mahsulot ishlab chiqarish yo‘lga qo‘yilgan.
Mamlakatimizning strategik jihatdan qulay joylashuvi va bu yerda tadbirkorlarga yaratilayotgan qulay sharoitlar tufayli kompaniya O‘zbekistonda ishlab chiqarishni mahalliylashtirish bo‘yicha o‘z qiziqishini bildirdi.
Muzokaralar yakunida “O‘zbekneftgaz” AJ tomonidan metall mahsulotlarga bo‘lgan ehtiyojlar bo‘yicha batafsil ma’lumotlarni xorij kompaniyasiga taqdim etish va yevropalik mutaxassislarni tizim korxona va boshqarmalariga tashrifini amalga oshirish, investisiya dasturlari hamda amalga oshirilayotgan loyihalarda hamkorlik qilishga kelishib olindi.