Яшил молия ва экологик лойиҳалар бўйича ҳамкорлик
“Ўзбекнефтгаз” АЖ Бошқарув раиси Швейсариянинг VEMA S.A. компанияси делегацияси билан учрашув ўтказди. Томонлар декарбонизация жараёнларига оид лойиҳа ташаббуслари ҳамда яшил молия ресурсларини жалб қилиш истиқболларини муҳокама қилдилар.
Музокараларда айниқса, метан чиқиндиларини аниқлаш ва камайтиришга қаратилган “LDAR” лойиҳаси, шунингдек, техник-иқтисодий асослар ишлаб чиқиш ва компрессор стансияларини модернизация қилиш бўйича ҳамкорлик масалалари кўриб чиқилди.
Шу билан бирга, барқарор авиация ёқилғиси (SAF) ишлаб чиқариш лойиҳаси бўйича ҳам амалий ҳамкорлик масаласи кун тартибидан ўрин олди.
Учрашув якунида томонлар қўшма экологик лойиҳаларни кенгайтириш ва “яшил” энергетика йўналишида фаол ҳамкорликни давом эттиришга тайёр эканликларини билдирдилар.
