Кун тартибидаги асосий масалалардан бири - коррупцияга қарши курашиш
“Ўзбекнефтгаз” АЖда коррупцияга қарши кураш масалаларига бағишланган йиғилиш ўтказилди. Унда Президент Администрациясининг Комплаенс хизмати раҳбари Эркин Йўлдошев ҳам иштирок этди.
Маълумки, давлатимиз раҳбарининг Мурожаатномасида давлат ва хўжалик бошқаруви органларида коррупцияга қарши курашни янги босқичга олиб чиқиш масаласига алоҳида эътибор қаратилиб, барча ташкилотларда мазкур йўналиш учун шахсан масъул раҳбар ўринбосарларини тайинлаш вазифаси белгиланган эди.
Ушбу топшириқ ижроси доирасида “Ўзбекнефтгаз” АЖ Бошқарув раисининг Комплаенс ва коррупцияга қарши ички назорат бўйича ўринбосари лавозими жорий этилиб, масъул раҳбар тайинланган эди.
Йиғилишда иштирок этган Эркин Йўлдошев 2026 йилда коррупцияга қарши курашиш бўйича давлат сиёсати даражасидаги асосий устувор вазифаларга тўхталиб ўтди. Шунингдек “фавқулодда ҳолат” доирасида давлат маблағларининг сарфланиши, давлат харидлари, тўғридан-тўғри шартномалар амалиёти ҳамда мансабдор шахслар фаолияти устидан назоратни кескин кучайтириш зарурлиги алоҳида қайд этилди.
Бошқарув раиси янги тайинланган ўринбосарга Жамиятда коррупция хавф-хатарларини келтириб чиқараётган сабаб ва омилларни барвақт аниқлаш, уларни бартараф этиш бўйича тизимли чора-тадбирлар ишлаб чиқиш, ички назорат, профилактика ва очиқлик механизмларини кучайтириш вазифаларини юклади.
Жамиятда дебитор қарздорликнинг юқори даражада экани танқид қилиниб, молиявий интизомни мустаҳкамлаш, ҳисоб-китоблар шаффофлигини таъминлаш ва қарздорликни қисқартириш бўйича аниқ топшириқлар берилди.
Йиғилиш якунида коррупцияга қарши кураш фақат назорат чоралари билан чекланмасдан, ҳар бир раҳбар ва ходимнинг шахсий масъулияти, ҳалоллик ва қонун устуворлиги тамойилларига таянилган ҳолда олиб борилиши зарурлиги таъкидланди.