“Ўзбекнефтгаз”: “Uzbekistan GTL” заводида яна бир янги маҳсулот – синтетик керосин ишлаб чиқарилиши йўлга қўйилди

Бош саҳифа Русский

Мамлакатимизнинг табиий газни чуқур қайта ишлаш салоҳиятини кенгайтириш, углеводород хомашёси импортини тубдан камайтириш, шунингдек республикамизнинг энергетика мустақиллигини мустаҳкамлаш мақсадида барпо этилган “GTL” заводи бугун нефть ва газ саноатини ривожлантириш учун янги имкониятлар эшигини очишда давом этмоқда.

“Ўзбекнефтгаз” АЖ Бошқаруви раиси Меҳриддин Абдуллаев топшириғи билан юқори халқаро стандартларга жавоб берадиган “GTL” маҳсулотларини биринчи навбатда, республиканинг нефть маҳсулотларига, хусусан, дизель ёқилғиси ва керосинга, шунингдек, суюлтирилган газга бўлган ички эҳтиёжини қоплаш учун етказиб берилиши бўйича белгиланган чора-тадбирлар тизимли равишда амалга оширилмоқда.

Куни кеча “GTL” заводида яна бир янги маҳсулот – халқаро стандарт (ASTM D-7566) ва техник талабларига мос бўлган синтетик керосин ишлаб чиқарилиши йўлга қўйилди.

Синтетик керосиннинг 23 та асосий физик-кимёвий ва техник параметрлари тўлиқ талаб даражасига етказилди. Асосий параметрлардан бири бўлган музлаш ҳарорати халқаро стандарт талаб даражасига (-47°С) етказиш ишлари якунланди.

Лойиҳанинг техник-иқтисодий асосномасига кўра, синтетик керосин Бухоро нефтни қайта ишлаш заводида ишлаб чиқариладиган “Jet А-1” авиаёқилғиси учун компонент сифатида қўлланиши белгиланган. Яъни, анъанавий “Jet А-1” авиаёқилғиси билан 50 фоизгача аралашмаси ярим синтетик “Jet А-1” сифатида авиацияда қўлланилишига рухсат этилган.

Бугунги кунга қадар “Uzbekistan GTL” заводи томонидан “IAТA”, “ASTM International”, “Def Stan” халқаро ташкилотларининг авиация ёқилғиси учун хом ашё сифатида “GTL” керосинини синтетик компонент сифатида фойдаланишга рухсат этилганлиги тўғрисида ижобий хулосалар олинган.

“GTL” заводида ишлаб чиқарилган синтетик керосинининг биринчи партияси намунаси олиниб, халқаро авиасоҳани тартибга солувчи ташкилот (IATA) тавсиясига кўра, мувофиқлик сертификатини олиш учун “SGS” компаниясининг Эстония, Бельгия ва Франциядаги лабораторияларига таҳлил ва тегишли хулоса олиш учун юборилди.

Заводда юқори сифатли ва экологик тоза бўлган синтетик суюқ ёқилғи маҳсулотларини ишлаб чиқариш ҳажмларини босқичма-босқич ошириб борилмоқда.

“Uzbekistan GTL” мажмуаси йилига 1,5 млн тонна синтетик нефть маҳсулотларини, шу жумладан дизель ёқилғиси, “GTL” керосин, суюлтирилган газ ва нафта маҳсулотларини ишлаб чиқариш имкониятига эга.

Бугунги кунга қадар “GTL” мажмуаси жами 55 минг тонна синтетик дизёль ёқилғиси ва 20,5 минг тонна синтетик нафта ишлаб чиқарилган бўлиб республика товар хом-ашё биржаси орқали кунлик равишда истеъмолчиларга етказилмоқда.

Маълумот учун: "Uzbekistan GTL" — "Ўзбекнефтгаз" АЖ таркибига кирувчи корхона бўлиб, дунёдаги энг йирик ва энг илғор заводлардан биридир. Лойиҳа Ўзбекистоннинг табиий газни чуқур қайта ишлаш қувватларини сезиларли даражада кенгайтириш ва углеводород хомашёси импортини кескин қисқартиришга қаратилган.

“Ўзбекнефтгаз” АЖ Матбуот хизмати

#нефть #газ #энергия #скважин #инвестиция #добыча #углеводород #экономика #завод #нефтебаза #қудуқ #кон #иқтисод #аёқш