“Ўзбекнефтгаз”: Ўзбекистонда қуёш энергетикасини ривожлантириш масалалари мутахассислар билан муҳокама қилинди

Бош саҳифа Русский

Жорий йилнинг 21 сентабрь куни Тошкент шаҳрида “Huawei Smart PV Partner Conference 2022” компанияси ҳамкорлигида қайта тикланувчи энергия манбаларини кенг жорий этиш орқали Ўзбекистонда “Яшил” энергетикани ривожлантиришга бағишланган анжумани ўтказилди. Унда “Ўзбекнефтгаз” АЖ Бош энергетик бўлими ва Инновацион фаолият бўлими мутахассислари ҳам иштирок этишди.

“Huawei” компанияси ҳамда "Ўзелтехсаноат" уюшмаси билан ҳамкорликда ташкил этилган ушбу анжуманни ўтказишдан мақсад, Ўзбекистонда “Яшил” электр энергияни ривожлантириш борасида ўзаро тажриба алмашиш, экотизимни мустаҳкамлаш ва энергетика соҳасида рақамли технологиялар, булутли ҳисоблаш ва сунъий интеллектнинг интеграциясини муҳокама қилиш учун платформа яратишдан иборат.

“Huawei Digital Power” компаниясининг Евросиё бўлими бош менежери Сю Хай ўзининг табрик нутқида Ўзбекистонда қуёш энергетикасини ривожлантириш салоҳияти жуда катта эканлигини, унинг тўлиқ ошкор этилиши давлатга иқтисодиётни трансформациялаш ва рақамлаштиришни жадаллаштиришга ёрдам беришини таъкидлади.

Қайд этилишича, фотоволтаик ечимлар йирик электр станциялари, тижорат ва саноат тармоқлари ва турар-жой қуёш энергияси бозори учун асосий энергия манбаи сифатида “Яшил” ақлли ечимларга ўтишни тезлаштиради. Иқтисодиётнинг турли тармоқларида қуёш технологияларини кенг тадбиқ этилиши электр энергиянинг ишлаб чиқариш таннархи пасайишини таъминлайди.

Конференция доирасида Ўзбекистонда қайта тикланадиган энергия манбаларини ривожлантириш бўйича экотизим ҳамкорлари, жумладан "Ўзелтехсаноат" уюшмаси бошқаруви раиси ўринбосари Аброр Боев, “Sun High-Tech”, “Solar Nature” ҳамда “SEPCOIII” компаниялари вакилларининг тақдимотлари бўлиб ўтди.

Таъкидлаш жоизки, бугунги кунда “Ўзбекнефтгаз” АЖга қарашли бошқарма ва корхоналардаги стратегик аҳамиятга эга объектларни узлуксиз электр энергияси билан таъминлаш мақсадида қайта тикланувчи энергия манбаларини жорий этиш бўйича тасдиқлаган “Йўл харитаси”га мувофиқ қатор амалий чоралар кўрилмоқда.

Хусусан, нефть ва газ объектларида камида 30 фоизгача электр энергиясини муқобил энергия манбаларидан олиш мақсадида қуёш панеллари ўрнатилмоқда. Тошкент ва Қарши шаҳарларидаги “Ўзбекнефтгаз” АЖ тасарруфидаги маъмурий биноларнинг электр энергияси таъминоти учун қуёш фотоэлектр станцияларининг барпо этилиши шулар жумласидандир.

Бундан ташқари “Ўзбекнефтгаз” АЖ Муборак газни қайта ишлаш заводида Давлат-хусусий шериклик асосида завод эҳтиёжлари учун жами 35,8 МВт электр энергиясини ишлаб чиқаришни кўзда тутувчи истиқболли лойиҳаларни амалга ошириш бўйича ҳам ишлар олиб борилмоқда.

Анжуманда бу борада маълум бир ютуқларга эришган вазирлик, идора ва корхоналарнинг мутахассислари қайта тикланадиган энергия манбаларини мамлакат иқтисодиётига жорий этиш, айниқса, қуёш энергетикасини ривожлантиришга эътибор қаратишнинг афзалликларини муҳокама қилишди.

Маълумот учун: “Huawei” компанияси кам углеродли технологияларни ривожлантиришга қаратилган илмий-тадқиқот инвестициялари бўйича дунёда иккинчи ўринни эгаллайди. 2022 йилнинг сентабрь ойида Ўзбекистон Республикаси Энергетика вазирлиги ва “Huawei” компанияси ўртасида ўзаро англашув меморандуми имзоланди.

Ушбу Меморандум асосида бугунги кунда “Huawei” компанияси ҳамкорлигида Муборак газни қайта ишлаш заводи ҳудудининг ёритиш тизими электр таъминоти учун қуёш фотоэлектрик станцияларини ўрнатиш лойиҳасининг иқтисодий-технологик асослари мутахассислар томонидан ўрганиб чиқилмоқда.

"Ўзбекнефтгаз" АЖ Матбуот хизмати

#нефть #газ #энергия #скважин #инвестиция #добыча #углеводород #экономика #завод #нефтебаза #қудуқ #кон #иқтисод #аёқш