“Ўзбекнефтгаз”: Муборак нефт ва газ қазиб чиқариш бошқармасида коррупцияга қарши курашишга бағишланган давра суҳбати ўтказилди

Бош саҳифа Русский

Мамлакатимизда демократик қадриятлар қарор топиб бораётган бир вақтда айрим давлат хизматчилари томонидан порахўрлик, мансаб мавқеини суиистеъмол қилиш билан боғлиқ жиноятларни содир этилиши ҳокимиятининг обрўсизланишга, давлатнинг сиёсий, иқтисодий, ҳуқуқий тизимига путур етишига, натижада амалдаги ҳокимиятга нисбатан норозиликка сабаб бўлмоқда.

Шу сабабли давлатимизда коррупцияга қарши курашиш учун Президентимиз томонидан фармон ва қарорлар қабул қилинган. Уларнинг ижросини таъминлаш мақсадида мамлакатимизда, шу жумладан “Ўзбекнефтгаз” АЖ тизимидаги Муборак нефт ва газ қазиб чиқариш бошқармасида ҳам коррупцияга қарши курашиш борасида тарғибот ва ташвиқот ишлари амалга ошириб келинмоқда.

“Ўзбекнефтгаз” АЖ Молиявий ва комплаенс назорат департаментининг комплаенс инспекторлари томонидан Муборак нефт ва газ қазиб чиқариш бошқармасида “Коррупция-мамлакат ривожланишига тўсиқ бўладиган иллат” ҳамда “Коррупциявий хавф-хатарларни аниқлаш, баҳолаш мезонлари ва уларнинг минималлаштириш” мавзуларида ўқув семинар ўтказилди.

Ўқув семинарда бошқарма директорининг ўринбосарлари, бошқарма бош мутахассислари, бўлим, цех ва участка ходимлари иштирок этдилар.

Унда “Ўзбекнефтгаз” АЖ Молиявий ва комплаенс назорати департаментининг бош комплаенс инспектори М.Мирзаев сўзга чиқди. У ўз нутқи аввалида йиғилиш иштирокчиларига коррупция ва унинг кўринишлари, коррупция-давлатни ич-ичидан емирадиган иллат, коррупцияга қарши курашиш-ҳамманинг бурчи эканлиги ҳақида йиғилиш қатнашчиларига тушунчалар берди.

Шундан сўнг, Ўзбекистон Республикаси Президентининг 2022 йил 11 майдаги “Давлат бошқаруви соҳасида коррупциявий хавф-хатарларни бартараф этиш механизмларини такомиллаштириш ва ушбу соҳада жамоатчилик иштирокини кенгайтириш чора-тадбирлари тўғрисида”ги Қарори ҳамда 2022 йилнинг 14 июндаги “Давлат органлари ва ташкилотлари фаолиятининг очиқлик даражасини ошириш ва баҳолаш тизимини жорий этиш чора-тадбирлари тўғрисида” ги Фармонининг мазмун моҳиятини, коррупциявий хавф-хатарларни аниқлаш, баҳолаш ва минималлаштириш йўналишларини презентация орқали йиғилиш қатнашчиларига тушунтирди.

Бундан ташқари “Ўзбекнефтгаз” АЖ Молиявий ва комплаенс назорати департаментининг комплаенс инспекторлари томонидан жорий йилнинг ўтган вақти мобайнида бошқармада олиб борилган ишлари, аниқланган камчиликлар ва уларни бартараф этиш борасида бажарилган ишлари тўғрисида ҳам ахборот берди.

Ўқув семинар давомида йиғилганлар ўзларини қизиқтирган саволлар билан “Ўзбекнефтгаз” АЖ Молиявий ва комплаенс назорати департаментининг комплаенс инспекторларига мурожаат қилдилар. Комплаенс инспекторлари эса семинар қатнашчиларининг саволларга мисоллар орқали жавоб бердилар.

“Ўзбекнефтгаз” АЖ Матбуот хизмати

#нефть #газ #энергия #скважин #инвестиция #добыча #углеводород #экономика #завод #нефтебаза #қудуқ #кон #иқтисод #аёқш