“Реал” Европанинг энг сердаромад клубига айланди

Молиявий фаолиятларни таҳлил қилиб борадиган машҳур Deloitte компанияси Европа футбол клубларининг 2017-18 йилги даромадлари ҳақидаги маълумотларни эълон қилди.

Рўйхатни Мадриднинг “Реал” клуби бошқариб бормоқда. “Қироллик клуби” ўтган йилги мавсумда рекорд даражада, яъни 750,9 миллион евро даромад кўрган. Натижада Чемпионлар лигасининг амалдаги ғолиби “Барселона” ва “Манчестер Юнайтед” клубларини сезиларли фарқ билан ортда қолдирди.

Каталониянинг бош жамоаси “Барселона” эса 2017-18 йилги футбол мавсуми давомида жами 690,4 миллион евро ишлаб топган. Бунгача рўйхатни бошқариб келган Англиянинг “МЮ” клуби эса ўтган мавсумдаги 666 миллион евролик даромади билан умумий рўйхатда 3-ўринга тушиб кетди. “Қизил иблислар”нинг бу муваффақиятсизлиги жамоа қайд этаётган қониқарсиз натижаларга боғлиқ, дейиш мумкин. Зеро, на ички, на халқаро майдонларда тузукроқ натижага эришолмаётган клубга инвесторлар пул беришадими?

Deloitte компанияси томонидан тақдим этилган рўйхатдаги дастлабки 10 клубдан 6таси Англия Премьер-лигаси вакилларидир. Рўйхатга “Манчестер Юнайтед”дан ташқари туманли альбионнинг “Манчестер Сити”, “Ливерпуль”, “Челси”, “Тоттенхэм” ва “Арсенал” клублари ҳам киритилган.

Топ-10дан яна Мюнхеннинг “Бавария” (умумий рўйхатда 4-ўрин) ҳамда сўнгги йилларда Франция чемпионатида гегемонликни қўлга олган “Пари Сен-Жермен” (6-ўрин) клублари ҳам ўрин олишган.

Санкт-Петербургнинг “Зенит” клуби эса 167,8 миллион евро йиллик даромади билан Топ-30дан жой олган Россиянинг ягона вакили бўлди. Питерликлар ушбу рўйхатда “Севилья”, “Бенфика” ҳамда “Лион” каби Европада анча таниқли клубларни ортда қолдиришган.