Stanislav Stratiyev. Shaxsiy fikrim qani? (hajviya)
Кирилл ёзувидаги матн пастда берилган
Ertalab Petrov bir qultum qahvasini ichdi-yu, xotinining peshonasidan o‘pib, ishga otlanmoqchi bo‘lib, ostonaga yetganda hayallab, cho‘ntaklarini kovlashtira boshladi.
— Nimangni izlayapsan? — dedi xotini.
— Fikrim… mening fikrim… topilmayapti, — dedi Petrov kiyimlarini paypaslab, kissalarini kovlashda davom etarkan. — Qayoqqa tiqdim ekan-a!
— Anovi cho‘ntagingdagi shalvirab turgan nima?
— Dastro‘molcham, — ming‘irladi Petrov. — Fikrim qayoqqa dafbo‘ldiykin-a?
U barcha cho‘ntaklarini ag‘darib ko‘rdi, portfelini titkiladi, kiyimlariniqoqishtirib ko‘rdi — topolmadi.
— Yo‘q, — dedi u xotiniga. — Sen bilmaysanmi, qayoqqa g‘oyibbo‘lganikin?
— Yaxshisi, hovliqmasdan, astoydil izlab ko‘r.
Petrov yana cho‘ntaklarini birin-ketin kovlashga tushdi. Afsuski, hechqayerda uning shaxsiy fikri yo‘q edi.
— Shoshmay tur-chi, — deya xotini peshonasini tirishtirdi. — Oxirgi martasen uni o‘tgan yili, yanvar oyida eslagandek bo‘luvding, shekilli. Korxonangda yillik reja tasdiqlanadigan kuni-chi?
— Yo‘q, xotin, adashyapsan. Men hali aqldan ozganim yo‘qki, yillik rejamuhokamasiga shaxsiy fikrim bilan borsam!..
— Hmm… Ha, aytmoqchi! Keyin vazirlikka chaqirishuvdi-ku? Ehtimol, fikringni o‘shanda obketgan bo‘lma tag‘in?
— Nimalar deyapsan, xotin? Vazirlikka kim ham o‘z fikri bilan boradi, a? Shunday nufuzli joyda, odatda, o‘zgalarning fikriga qo‘shilasan, bas! Yo‘q, u gal fikrimni obketmaganman.
— Unda qayoqqa gumdon bo‘ladi? Aslida bormidi o‘zi?
— Bor edi, bor edi, mana, endi yo‘q.
— Yopiray! Savil qolgur fikring qaysi kavakka kirib ketdiykin, a?
Xotini chuqur o‘yga toldi. Eri so‘nggi paytlarda qayerlarga boruvdi, o‘zibilan o‘z fikrini qachon obketuvdi?
— O, topdim! — deb qiyqirib yubordi xotini. — Esingdami, Bosh direktoringga tishini qayrab yurgan Simeonov degan shartaki xodimlaring boredi-ku, o‘shani ishdan bo‘shatadigan kun esingdami? Fikringni o‘sha kungimajlisga obketgansan. Yodingga tushdimi?
— Yodimda, — dedi Petrov bamaylixotir. — Lekin o‘shanda bizdan majlisqarorini qo‘llab-quvvatlashgina so‘ralgan, xolos. Shaxsiy fikr hech kimniqiziqtirmagan.
— Balki sen uni muhim hujjatlaring saqlanadigan g‘aladonga solibqo‘ygandirsan?
— Qo‘ygandim. So‘ng bir marta olish uchun ochib… oldimmi yo yana solibqo‘ydimmi, esimda yo‘q.
— Menga qara, shu tobda shaxsiy fikring nega kerak bo‘p qoldi? Negayopishib olding? Axir, ishga ketyapsan-ku? So‘rab qolsalar, “uyda qopti”, deb aytarsan-da.
— Xo‘p, aytarman. Mabodo, uni mutlaqo yo‘qotib qo‘ygan bo‘lsam-chi?
— Qiyomat qo‘pmas! Uningsiz ham binoyidek yashab kelyapsan-ku!
— To‘g‘riku-ya… Har holda, doim uningsiz yashash ham yaxshimas. Birornozik joyda kerak bo‘p qolsa, nima degan odam bo‘laman?
— Yo‘q, har holda, har holda… Biror joyda bordir u? Hech bo‘lmasa, bir qurqarab ko‘raylik-chi!..
Xotini shiddat bilan kiyim-kechak, ko‘rpa-to‘shaklarni ag‘darishga tushibketdi…
— Mana u! — dedi xotini terlarini arta-arta. — Sen uni eski paltongningcho‘ntagida qoldiribsan. Bu paltoni, bilasanmi, ikki yil oldin chiqitgachiqarib tashlovding.
— To‘ppa-to‘g‘ri, shaxsiy fikrim! — quvonib ketdi Petrov. — Ikki yil oldinopchiqqan ekanman-u, yana o‘sha joyida paqqos unutib qoldiribman-a?
— Men paltoni yuvishga topshirvorgandim-ov. Bu yoqqa ol-chi, kirmoshindafikring ivib, titilib ketmadimikin? — Shunday deb xotini aylantirib-aylantirib, silkib-silkib, puflab-puflab eriga fikrini qaytarib berdi. — Yo‘q, jinham urmabdi. Aksincha, xuddi yangidek.
— Albatta-da, men undan deyarli foydalanmadim, axir.
— To‘g‘ri qilasan. Menam paltongni bolaxonaga chiqarib tashlamoqchiydim. Baribir kiymaysan-ku!
— Menda yangisi bor-ku. Pochapo‘stin.
— Endi fikringni boshqa, ko‘rinarli joyga qo‘y. Qutichagami, hujjatlaringning orasigami? Yaxshisi, eng ishonchlisi — omonatdaftarchangning qatiga joylab qo‘ya qolganing durust.
Petrov shaxsiy fikrini daftarcha qatiga joyladi-yu, xotinining peshonasidano‘pib, mamnun holda eshikdan chiqdi.
Ruschadan Ahmad Oqnazarov tarjimasi
Станислав Стратиев. Шахсий фикрим қани? (ҳажвия)
Эрталаб Петров бир қултум қаҳвасини ичди-ю, хотининингпешонасидан ўпиб, ишга отланмоқчи бўлиб, остонага етганда ҳаяллаб, чўнтакларини ковлаштира бошлади.
— Нимангни излаяпсан? — деди хотини.
— Фикрим… менинг фикрим… топилмаяпти, — деди Петров кийимларини пайпаслаб, киссаларини ковлашда давом этаркан. — Қаёққа тиқдим экан-а!
— Анови чўнтагингдаги шалвираб турган нима?
— Дастрўмолчам, — минғирлади Петров. — Фикрим қаёққа дафбўлдийкин-а?
У барча чўнтакларини ағдариб кўрди, портфелини титкилади, кийимларини қоқиштириб кўрди — тополмади.
— Йўқ, — деди у хотинига. — Сен билмайсанми, қаёққа ғойиббўлганикин?
— Яхшиси, ҳовлиқмасдан, астойдил излаб кўр.
Петров яна чўнтакларини бирин-кетин ковлашга тушди. Афсуски, ҳечқаерда унинг шахсий фикри йўқ эди.
— Шошмай тур-чи, — дея хотини пешонасини тириштирди. — Охиргимарта сен уни ўтган йили, январ ойида эслагандек бўлувдинг, шекилли. Корхонангда йиллик режа тасдиқланадиган куни-чи?
— Йўқ, хотин, адашяпсан. Мен ҳали ақлдан озганим йўқки, йиллик режа муҳокамасига шахсий фикрим билан борсам!..
— Ҳмм… Ҳа, айтмоқчи! Кейин вазирликка чақиришувди-ку? Эҳтимол, фикрингни ўшанда обкетган бўлма тағин?
— Нималар деяпсан, хотин? Вазирликка ким ҳам ўз фикри биланборади, а? Шундай нуфузли жойда, одатда, ўзгаларнинг фикригақўшиласан, бас! Йўқ, у гал фикримни обкетмаганман.
— Унда қаёққа гумдон бўлади? Аслида бормиди ўзи?
— Бор эди, бор эди, мана, энди йўқ.
— Ёпирай! Савил қолгур фикринг қайси кавакка кириб кетдийкин, а?
Хотини чуқур ўйга толди. Эри сўнгги пайтларда қаерларга борувди, ўзибилан ўз фикрини қачон обкетувди?
— О, топдим! — деб қийқириб юборди хотини. — Эсингдами, Бош директорингга тишини қайраб юрган Симеонов деган шартакиходимларинг бор эди-ку, ўшани ишдан бўшатадиган кун эсингдами? Фикрингни ўша кунги мажлисга обкетгансан. Ёдингга тушдими?
— Ёдимда, — деди Петров бамайлихотир. — Лекин ўшанда бизданмажлис қарорини қўллаб-қувватлашгина сўралган, холос. Шахсий фикрҳеч кимни қизиқтирмаган.
— Балки сен уни муҳим ҳужжатларинг сақланадиган ғаладонга солибқўйгандирсан?
— Қўйгандим. Сўнг бир марта олиш учун очиб… олдимми ё яна солибқўйдимми, эсимда йўқ.
— Менга қара, шу тобда шахсий фикринг нега керак бўп қолди? Нега ёпишиб олдинг? Ахир, ишга кетяпсан-ку? Сўраб қолсалар, “уйдақопти”, деб айтарсан-да.
— Хўп, айтарман. Мабодо, уни мутлақо йўқотиб қўйган бўлсам-чи?
— Қиёмат қўпмас! Унингсиз ҳам бинойидек яшаб келяпсан-ку!
— Тўғрику-я… Ҳар ҳолда, доим унингсиз яшаш ҳам яхшимас. Бирорнозик жойда керак бўп қолса, нима деган одам бўламан?
— Йўқ, ҳар ҳолда, ҳар ҳолда… Бирор жойда бордир у? Ҳеч бўлмаса, бирқур қараб кўрайлик-чи!..
Хотини шиддат билан кийим-кечак, кўрпа-тўшакларни ағдаришга тушибкетди…
— Мана у! — деди хотини терларини арта-арта. — Сен уни эскипальтонгнинг чўнтагида қолдирибсан. Бу пальтони, биласанми, иккийил олдин чиқитга чиқариб ташловдинг.
— Тўппа-тўғри, шахсий фикрим! — қувониб кетди Петров. — Икки йилолдин опчиққан эканман-у, яна ўша жойида паққос унутибқолдирибман-а?
— Мен пальтони ювишга топширворгандим-ов. Бу ёққа ол-чи, кирмошинда фикринг ивиб, титилиб кетмадимикин? — Шундай дебхотини айлантириб-айлантириб, силкиб-силкиб, пуфлаб-пуфлаб эригафикрини қайтариб берди. — Йўқ, жин ҳам урмабди. Аксинча, худдиянгидек.
— Албатта-да, мен ундан деярли фойдаланмадим, ахир.
— Тўғри қиласан. Менам пальтонгни болахонага чиқарибташламоқчийдим. Барибир киймайсан-ку!
— Менда янгиси бор-ку. Почапўстин.
— Энди фикрингни бошқа, кўринарли жойга қўй. Қутичагами, ҳужжатларингнинг орасигами? Яхшиси, энг ишончлиси — омонатдафтарчангнинг қатига жойлаб қўя қолганинг дуруст.
Петров шахсий фикрини дафтарча қатига жойлади-ю, хотининингпешонасидан ўпиб, мамнун ҳолда эшикдан чиқди.
Русчадан Аҳмад Оқназаров таржимаси
Манба: https://ziyouz.uz/jahon-nasri/jad-boshqa-asarlar/stanislav-stratiev-shahsij-fikrim-an/