Янгиер шаҳрида яна бир оилавий мактабгача таълим муассасаси фаолият бошлади.
Болалар бизнинг бахтимиз ва келажагимиз. Ота-она учун фарзанд камолини кўришдан ортиқ бахт йўқ бу дунёда. Комиллик йўлидаги биринчи қадам мактабгача таълим муассасасидан бошланади.
Янгиер шаҳар мактабгача таълим бўлими томонидан мактабгача таълим соҳасида қабул қилинаётган қарорлар ижросини таъминлаш, давлат мактабгача таълим муассасаларини янгидан таъмирлаш ҳамда шаҳара нодавлат таълим муассасаларини ташкил этиш юзасидан бир қатор ишларни амалга оширмоқда.
Бугунги кунда шаҳарда нодавлат, оилавий ҳамда давлат-хусусий шерикчилик асосидаги таълим муассасалари ташкил этиш ишлари жадал суръатлар билан олиб борилмоқда.
Жумладан, бугун шаҳардаги З.М.Бобур номли маҳалла фуқаролар йиғинида яшовчи ташаббускор Воҳидова Гулчеҳра томонидан қуввати 25 ўринли, болалар учун “Гулбаҳор” номли оилавий мактабгача таълим муассасаси фойдаланишга топширилди.
Ушбу муассаса бугунги кунда 3 нафар маҳаллий аҳолини иш ўринлари билан таъминлади.
Таълим муассасасини очилишида маҳалла оқсоқоллари, фахрий отахонлар ва онахонларимиз, ушбу муассасада тарбияланаётган болажонларнинг ота-оналари иштирок этдилар.
Тадбирни очиб бериш учун ташриф буюрган шаҳар ҳокими ўринбосари А.Абдуқодиров ўзини табриклари ҳамда фикр ва истакларини йиғилганларга баён этиб, келажагимиз эгалари бўлмиш жажжи болажонларни ушбу муассаса билан чин юракдан табриклади.
Тадбир давомида шаҳар мактабгача таълим бўлими мудири Д.Ибрагимов сўзга чиқиб бугунги кунда мактабгача таълим тизимига юртимизда жуда катта эътибор берилаётганлиги ҳамда шаҳримиздаги давлат мактабгача таълим ташкилотлари, нодавлат оилавий мактабгача таълим муассасалари, давлат-хусусий шерикчилик асосидаги мактабгача таълим муассасалари тўғрисида алоҳида тўхталиб ўтди.
Оилавий мактабгача таълим муассасасида болажонларнинг таълим–тарбия олишлари учун барча шарт-шароитлар муҳайё қилинган.
Машғулотлар хонаси, мусиқа зали, ётоқхона ҳамда овқатланиш хоналари замонавий жиҳозлар билан таъминланди.
Бино атрофи ободонлаштирилиб, кўкаламзорлаштирилди.
Ушбу таълим муассасасида З.М.Бобур номли маҳалла фуқаролар йиғинида истиқомат қилаётган аҳолининг 3-7 ёшли болажонлари тарбияланади.
Янгиер шаҳар ҳокимлиги Матбуот хизмати
