Намазда сутра қоюдың үкімі.
Талха өз әкесінен (Аллаһ олардан разы болсын) риуаят еткен хадисте Аллаһ Елшісі ﷺ айтты:
«Сендердің бірің алдыңа ер-тоқымның артқы тірегіндей нәрсе (сутра ретінде) қойса, намазын оқи берсін. Оның ар жағынан кім өтсе де, оған мән бермесін».
Шейхул-Ислам Шәбир Ахмад әл-Усмани әл-Ханафи әл-Матуриди «Фәтху әл-Мулһим би-шарх Сахих Муслим» кітабында (1111-ші) хадистің түсіндірмесінде айтты:
Бұл хадистен намаз оқушының алдына сутра қоюдың мустахаб екендігі түсініледі. Солай хадистің түсіндірмесінде келген.
Имам Абдур-Раззақтың «Мусаннаф» еңбегінде Нафиғтан риуаят етіледі:
«Ибн Омардың (Аллаһ одан разы болсын) ер-тоқымының артқы тірегі шамамен бір шынтақтай болатын».
Сондай-ақ әл-Хаким ан-Найсабури, Ахмад ибн Ханбал және басқалар риуаят еткен хадисте бұйрық түрінде келген:
«Сендердің бірің намаз оқыса, сутраға қарап оқысын және ешкімді алдынан өткізбеcін».
Ал «әл-Муния» кітабында сутраны тастау мәкруһ екені айтылған, бірақ бұл — тәнзиһи мәкруһ. Бұйрықтың уәжіп емес (мустахаб) екеніне дәлел ретінде Әбу Дауд әл-Фадл ибн Аббастан (Аллаһ одан разы болсын) риуаят еткен хадис келтіріледі:
«Біз Пайғамбарымызды ﷺ далада, алдында сутрасыз намаз оқып жатқанын көрдік».
Сондай-ақ Ахмад ибн Ханбал риуаятында:
«Ибн Аббас (Аллаһ одан разы болсын) ашық жерде, алдында еш нәрсе жоқ күйде намаз оқыды».
«Егер адам адамдар өтпейтін жерде және жолға қарама-қарсы тұрмаса, сутраны тастау мәкруһ болмайды. Өйткені сутра — өтіп кетушіден тосқауыл үшін қойылады», – делінген.
«Әл-Бахру» кітабында «әл-Хилиядан» жеткізіледі:
«Мұндай жағдайда да сутра қою абзалырақ. Тіпті оны тастау мәкруһ болмаса да, басқа мақсат үшін — көзді ар жағындағы нәрселерден тыю және ойды жинақтау үшін пайдалы».