AMD урвали 24,6% торга процесорӯв x86 — другый раз в історії мавут тӯлко читаво

За минувшый квартал AMD удорвали уд Intel 2% у сеґментови процесорӯв x86, типирь йих часть є аж 24,6%, як розказує нам звіт аналітикӯв из Mercury Research. За цїлу історію фірмы AMD они мали лїпшый резултат лиш раз — у 2006. рокови AMD урвали были аж 25,3% торга процесорӯв x86 у четвертому кварталови того года.

Што ся кыват новтбукӯв из процесорами AMD архітектуры x86, не позиравучи на IoT-девайсы, йих частка є 22% — на 1,8% май много, чим гӯд типирь, исе тоже є новым рекордом AMD. Тритьый квартал рока 2021 тоже став рекордным дїла AMD, бо новтбукы принесли йим 16,2% дохода, што на 1,3% бӯлше ги минувшого квартала, тай на 3,9% бӯлше ги того року.

Мож раховати ож исе є прямым резултатом нової мікроархітектуры Zen 3 тай ґрафікы RDNA2 (відеокарты серії Radeon 6000).

Уже шестый квартал за шором AMD прибавлявут свою долю торга в сеґментови персоналных компютерӯв, главной спозад того, ож поставкы поцесорӯв Ryzen 5000 ай дале идут идгорі.

Сеґмент "ґеймерського" выбавленя тоже наскоро росте, читаво ся продавут відеокарты Radeon. Попиля сього всього треба тямити ай за конзолы из бавками выд Sony тай Microsoft, котры типирь тоже хоснувут чіпы уд AMD.

— кажут у "черленӯм лаґрови"

У минулӯм кварталови AMD мала щи єден рекорд — зобрали выручкы на 4,3 міліарда америцькых доларӯв. А вже скоро, восьмого новембра, буде далша читава презентація AMD, де чекаєме анонсованя процесорӯв EPYC (Milan-X) тай многочіпового ґрафічного ускорьовача MI250. Нагадаєме, ож недавно AMD казали, ож будут давати на торг процесоры из ядром Zen 3 тай технолоґійов 3D V-Cache на зачаткови года 2022, а у другӯв половци рока йих замінят чіпы Raphael, но уже на новӯв платформі — AM5 (там вже будете мати ай DDR5, ай PCI Express 5.0)

Жерело: ITC.UA

Читайте нас на Twitter тай Telegram