Відеокарта выд AMD из 128 ґіґабайт памняти — не зовсїм відеокарта

Фірма AMD презентовала першу у світови відеокарту из двома окремыма ґрафічныма чіпами, так ги ся аддека обіцяли. Исе карты серії Instinct MI200.

Туй треба розуміти ож исе сут "відеокарты" сугубо технічно, айбо хосновати ся будут майбӯлш у великых дата-центрах тай серверах. Технолоґічно тото сут "ґрафічні ускорьовачі", айбо бавити бавкы на них нитко не буде.

На типирь знаєме ож будут раз дві моделі: Instinct MI250 и Instinct MI250X. Рӯзнят ся сугубо актівными потоковыми процесорами в самому чіпови.

Обідві карты сут базовані на новому ґрафічному процесорови, кодова назва Aldebaran ("адде баран" прим. інтерфийсы). Выраблят ся по технолоґічному процесови 6 нанометрӯв, чіпова архітектура CDNA2. У модели MI250X там буде 220 актівных блокӯв обрахованя, тото 14 080 потоковых процесорӯв, а у "молодшӯв" модели, Instinct MI250 тото вже 208 блокӯв обрахованя, а значит 13 312 потоковых процесорӯв. Частота процесора в обох припадах буде 1,7 ґіґагерц. 128 ґіґабайт відео-памняти HBM2E фунґувут на частотї 3,2 ґіґагерца, а наєдно из шинов на 8192 розряды тото дає пропуск даных аж до 3,2 терабайта в секунду.

Резултувуча мӯц карт є 47,9 TFLOPS (FP32 и FP64) тай 383 TFLOPS (FP16), а у "молодшӯв" модели тото 45,3, 47,9, тай 362 TFLOPS респектівно. Кроме сього у AMD давут ай далші метрикы — скорӯсть матричных обраховань (matrix performance). У MI250X тото буде 95,7 TFLOPS (FP32 и FP64), а у MI250 — 90,5 TFLOPS. У AMD кажут ож исе сут перві такі рїшеня в класови Exascale, тай позиціонувут MI250X ги кым майшіковный у світови ґрафічный ускорьовач из нацїленьом на матричні обличованя тай штучный інтелект.

Попиля того всього треба повісти ож карта буде мати до восьми каналӯв інтерфейса Infinity Fabric, котрыма ся изкапчує из процесорами Epyc. Сесї дві новикны сут учинені у форм-факторов OCP Acceleration Module из сістемами пасівного остужованя, тай мавут покажчик TBP (Total Board Power) на 500 Вт, но піковоє значіня аж 560 Вт. Чекаєме пак дале ай нові верзії, MI210, уже из привычным інтерфейсом PCIe.

Жерело: ixbt

Читайте нас на Twitter тай Telegram