Куды пропали телефоны из кнопками?

У продовжіня нашої спередущої публикації за гычкофоны, хочеме розказати вам куды тай чого счезли телефоны из фізичныма ґомбами.

Час носталґії

Ги ся уже споминало, сякый телефон у многых из нас быв ипен первым телефоном, спозад чого дниська много люди берут го не лиш спозад його реалных параметрӯв ци моцности, ай скорше гикой атрибут тых часӯв, кой они были май молоді тай май легко ся жило.

"Ґомбичковый телефон у ня быв, лем ни докус тямлю якый, навірно даякый старый Siemens. Добрі тямлю, ож фурташно-м на нёму бавив бавкы. У єднуй треба было стріляти балоны, а у другуй треба было дяпсиком дись на складови сувати падавучі лады у шор ги у тетрісови. Віновав им тым бавкам ни єден вичур коло шпагрийта, завто споминкы у ня узывавут приятну носталґію."
— Юрко, зкушеный хосновач ґомбового телефона

Сам автор сиї публикації тоже має читаво споминок за телефоны из кнопками. Но окремо хоче ся спомнити за єден конкретный — Nokia C3-00, парадный, функціоналный, но читаво туньый девайс, котрый ся убстав у серцьови навхтема.

Автор статї має сентіменты ид телефонам из фізичнов клавешницьов, а кым май — ид повнӯв QWERTY клавешници. Тото быв упознаваный детайл дуже серйозных телефонӯв «бізнес» класа, гикой шелиякі Blackberry. Nokia C3-00 были ачий майтуньым телефоном из таков клавешницьов, доступнов на торгови у рокови 2010. Главной спозад того, ож телефон не быв у катеґорії «розумных телефонӯв». Закидь ушыткі направы уд вендора Nokia из фізичнов QWERTY клавешницьов были на Symbian, тай гордо ся кликали смартфонами, наш днишньый герой (С3-00) фунґовав на доста простинькӯв платформі S-40, котра не была валовшна много. Айно, телефон уже не мож было кликати гычков бодай спозад того, ож там быв Wi-Fi тай інтернет-бравзер, но на сюм кониць. За даякі аплікації ци соціалні сїтї нїшто было ай думати. Мож было ґуґловати тай писати мейлы, мож было никати відеа в YouTube, но тай сього было доста на рӯк 2010.

Первым «ґомбовым» телефоном у ня была ачей Nokia 3220 — дустав єм ї дас у 2006. годї, айбо уже через гуд она умерла у райбачці (забыв єм ї утягти з жеба). Я тот телефон хосновав головно ги «звонилку». Ушыткі мої далші «ґомбові» телефоны были тоже «нокіями». Другым быв Nokia 6230i. Сесь уже мав и екран май файный ги у «3220», и інфрачервеный порт, и радіо мож было на нёму слухати (айбо так ми ся видит, ож на то требало припоити наушникы), и даже бавкы на нёму были: я точно тямлю лиш, ож мав єм там даякі гонкы тай «спайдермена против венома».
— Петро, екс-хосновач телефона из клавешницьов

Айбо майвыразным про автора была якраз клавешниця, котра давала возмогу писати текст в разы скорше гикой на другых доступных в тот час девайсох. Стандартні «телефонові» клавешницї на 12 кнопок цифро-буквового уведеня были доста потихыми обы писати дашто бӯлшоє выд смс. А сенсорні дісплеї были авадь из резістівным сенсором, котрый мав читаво ґанджу из точностьов тай силов натиска; авадь были капасіторові сенсоры, котрі непӯдло детектили натиск, айбо были доста малинькі тай дорогі. Ипен на гӯд 2010. майшіковным текстовым ґенератором за свої гроші быв телефон (не смартфон) Nokia C3-00.

Чого днишні телефоны без ґомбичок?

Та кидь подобна клавешниця была онь так читава, куды она пропала? Чом дниська на торгови почти ниє телефонӯв из фізичнов клавешницьов? Туй даже не говориме за QWERTY, бо вендоры докус удвергли ідею мати бӯлше ги 3-4 кнопкы на новых направах. Датко буде казати ож ушытко ся зачало из простої моды, бо фірмы зачали йти по ступнях iPhone. Не мож казати ож тото целком не правда, но фізичні клавешницї стали лишек сеґментовов опційов не просто спозад того, ож «мода ся поміняла».

Давайте попробуєме дослїдити, чом ипен сяк ся стало.

Дорого

Тото ся може лиш видит, но выроба єдного дісплея — ото май дешево, гикой выроба такого, лиш піціко меншого, дісплея + щи фізична клавешниця. Треба розуміти, ож фірма, котра занимат ся выробов, часто купує готові детайлы уд другых заводӯв, а почас мусит си припаровати унікалну детайл пуд сись конкретный смартфон (гикой QWERTY клавешниця), котра не буде паровати на даякый другый, а значит, фірма має быти бизӯвна ож побирує тото ушытко продасти, обы выроблені клавешницї не гнили на складах, просто бо сякі моделі телефонӯв продавут ся менше, гикой чекало ся. А чом ся менше продавут — за исе ся каже дале.

Пріорітеты

Смартфоны, уже даже не телефоны, ставут нам многым бӯлше, гикой просто телефоны. Из каждым роком ваша жебова направа перебират у ся бӯлше функцій, на котрі вам давно треба было мати окремоє матаржиня. Радіо? Туй го маєте! Фотокамера? Легко! Дниська уже повно смартфонӯв мавут кваліту готовых образчикӯв многым лїпшу гикой даяка проста камера пару рокӯв назад. Відео-редактор? Без проблем! Туй даже мож спомнити ож сут даже повноцїнны кіна, накручені на iPhone. Айбо сесе ушытко не задарь. Каждый из сих компонентӯв, исписови котрых ниє краю, буде придавати ид цїнї телефона щи цятку, спозад додаточної выробы як фізичных, так проґрамных компонентӯв. Значит просїкова цїна смартфона, даже кым май простинького, росте каждӯй гӯд.

У єден момент выробникы телефонӯв поняли, ож запхати у сяку направу гет-гет ушытко буде не реално, треба выбрати што май важноє. Та кидь усядити стӯвку люди, тай дати выбрати из исписа 5 майважных про них функцій телефона, та фізичної клавешницї не буде почти ни у кого. Даже кидь выбирати 10 майважных — мало тко спомнит за солодинькі ґомбы.

Фурт держали сьме дома Nokia 1280, котрый хосновав ся чисто ги «звонилка», обы наберати номеры «МТС». Пораз брав єм тот телефон на постояноє хоснованя, кой из моим трафляв ся даякый форс-мажор авадь ун ишов на ремонт. Не тямлю, обы «1280» даколи переставав робити, сякый ун герой без плаща. :)
— Петро, має дома запасный телефон

Медіа

Ваш телефон, авадь скорше смартфон, перестав быти лишек направов звонити тай писати смс. Вӯн помалы ставав посправдїшньым медіа-центром: екран з роками ся збӯлшовав, кваліта образчика росла. На телефонах зачали накручовати тай никати відеа, читати книжкы, мальовати, редаґовати образчикы, писати повно текста. За тото обы звонити уже мало тко думат. Телефон став просто меншов верзійов компютера у вас у жебови.

Ушытко ся уперло в тоту образовку. Екран мусїв быти великым, обы фест было видко читати книжку, авадь позирати кіно, закидь ся везете у поїздови у другый варош. Такой на сюй образовци поникаєте навіґацію, обы шіковно найти ресторан, ачий путьованя поїздом годно вас изфараловати. Почитаєте што пишут за ресторан другі люди, поникаєте фотькы ож як вызират у них їда.

Екран став многым май важный, гикой ушытко другоє у вашому телефонови. Фірмы просто мусїли принести у жертву фізичну клавешницю, бо она занимала помного міста на направі, а хосновала ся не аж так часто.

Само собов, ож тогдышні телефонові направы ниваловшні были чинити и пувпроцента того, чого сут валовшні днишні, айбо было нам доста и того, бо за другі можностї чилядник и ни знав. Дниськы-м уже скушеный хосновач, завто ми ся ни дуже вірує, ож муг бы-м ся из усвідоминя переключити май назад на даяку таку «гычку». Дїла мене телефон уже ни тулко серсама на бисїдованя, кулко навіґатор, тапловка, нотес, новинка атд. Хоть пораз телефон направду булше шкодит ги помыгат затягувучи чилядника у исю сїтку на годины, котрі бы муг ухосновати май добрі.
— Юрко, не лудно му за старыми гычкофонами

Выслїдкы

Убстали сьме ся у ситуації, кой такой самі фірмы удвергли ідею фізичної клавіатуры, бо сам торг телефонӯв, тай вымогы, які клали ид смартфонам хосновачі, діктовали сяку жертву.

Айно, фізична клавешниця є доста стӯчна про многых люди, хоть направду проґрамна (екранова) клавешниця уже днись не буде слабша, ай скорше даже лїпша выд фізичної по функціоналу тай скорости. Маймало завто, ож проґрамна клавешниця дає вам возмогу совати ґомбы як хочете, хосновати паралелно пару инчакых розкладок, налегко хосновати спец.сімболы, має многым май читаві інструменты авто-угадованя текста, тай повно другого.

Даже комбіновані варіанты из клавешницьов, яка ся годна высовати, пропали домак, бо така конштрукція направы была аж дуже «тучна», тай не бизӯвна, бо детайлы, котрі ся фурт кывавут, знавут ся май часто ламати. А вы не дуже хочете обы ваша тиґла за 400-600 доларӯв перестала фунґовати бо удломив ся слайдер.

Ци увидиме мы щи навертаня фізичных клавешниць у світови смартфонӯв авадь май простых тиґлофонӯв? Ци буде тото 12-ґомбова схема, ци повнорозмірна QWERTY? Скорше всього тото ся убстане далеко в історії, тай нашироко сякі девайсы ся хосновати уже не будут. Убстанут ся лиш гикой нагузко-спеціалізовані телефоны.

Послідньый «простый» телефон мав им десять годув назад: Nokia 1202. Дуже ми ся любила його простолінійна практичнусть: чорнобілый екран, малый розмір, мнягкі, онь шовкові ґомбичкы. Ковід из його електронными сертифікатами ясно вказав, ож тот час ся вже ниґда не верне. Телефон «на мінімалках» мож тримати хыба запасным, обы го пораз утігати з фійовкы на «детокс».
— Томаш, не фанат ковіда

Айно, дниська можеме видїти тренд на сякі гычкофоны, но причинов любови ид ним є не фізична клавешниця, ай скорше провба утїкти уд тиску шелиякых «соціалок», провба менше стресовати спозад читавого потока інформації, котрый тягне за собов тот смартфон.

А фізичні клавешницї, гикой дашто масовоє, можеме загребсти у нашӯй памняти. Но не треба бановати, бо завтра буде новый динь, из новыма рїшенями.

Авторськый текст Інтерфийсы.

Читайте нас на Twitter тай Telegram