Інтернет-бовт Micro Center розкрыв детайлы нового процесора выд Intel - Core i9 Alder Lake

Нова гібридна архітектура буде на торгови выд 4. новембра, выд $669.99

Подаякым людьом трафило ся купити тестові екземплары процесорӯв Core i9-12900K, но технічні спеціфікації не самого процесора, не ядра Alder Lake не были розкрыті. На сайтови бовта Micro Center появила ся была сторӯнка (уже изпрятана), де была інформація за будучный продаж процесорӯв, што ся зачне 4. новембра. Пониже можете видїти як тото вызирало.

Спеціфікації розказувут нам ож процесор буде фунґовати на частотї 3.2 ґіґагерца, из максималнов скоростьов 5.2 ґіґагерца у турбо-режімови, максімално буде мати 16 ядер (8 моцных тай 8 економных) из 30 меґабайт кеш-памняти тритього уровня. Ги ся чекало, спеціфікації указувут на пуддержку оперативної памняти стандарта DDR5, шины PCIe пятої ґенерації, тай чіпові платформы Intel Z690. Материнські платы из чіпсетом Intel Z690 мавут зайти на торг того самого числа.

У авґустови місяцьови Intel ся обіцяли презентовати нову архітектуру Alder Lake из 16-ма ядрами гібрідного тіпу: 8 моцных тай 8 енерґо-ефектівных. Треба розуміти ож на дниська исе буде лишек "преміум" сеґмент. Такый процесор буде держати аж 24 операційні потокы (по два потока на моцноє ядро, тай єден поток у економного), довєдна буде брати аж 125 Ватт світла.

21 октовбра сайт Micro Center изпрятав гет сторӯнку из спеціфікаціями тай цїнов.

Жерело: The Verge

Читайте нас на Twitter тай Telegram