Што указали Intel на CES 2022: нові процесоры, чіпсеты, тай чекані діскредні відеокарты ARC

Ги ся чекало, Intel нам указали цїлый шор вшелиякої продукції про простых хосновачӯв, тай уже дуже скоро увидиме на торгови новтбукы тай компютеры из насвіжо презентоваными новинками.

Десктоповы процесоры Alder Lake

Щи в октовброви того року было чути за поєдны процесоры нової 12. серії уд Intel, котрі будут марковані ги Alder Lake. Головнов новинков тогото колїна процесорӯв буде хоснованя гібридной архітектуры из двома инчакыми типами ядер уєдно: читаво силні ядра (Performance) тай енерґоефектівні (Efficient) на єдному чіпови. При тӯм многопоточнӯсть (Hyperthreading) будут держати лишек тоты моцні ядра, закидь ефектівні будут убрабляти лиш по єдно. Ушыткі чіпы Alder Lake будут годни держати оператівну памнять стандарта DDR5 тай аж 16 линій PCIe 5.0

Сиї осени было чути, правда, лишек за 6 моделӯв (ци даже 3, кидь не раховати тоты што мали авадь не мали ґрафічноє ядро окремым моделом). На CES2022 указали нам доста читавый испис, из онь 22 моделӯв процесорӯв, выд малинькых до читавых.

Нові моделі, направду, не будут мати розблокованый множник частоты, што значит не будете годни йих гнати. На другого бока тоты процесоры не будут аж тӯлко їсти світла. Маймоцный модел из сього исписа, Core i9-12900 має уведено у документох лишек 65 Ват Processor Base Power, в тот самый час розблокована варіанта, Core i9-12900K, має аж 125 Ват.

Спомежи другых новинок тоже варта спомнити окремі верзії без ґрафічного ядра, из ідентіфікатором F, тай щи май економічні процесоры из ідентіфікатором T, што мавут параметер Processor Base Power 35 Ват. Май детайлні характерістікы тыхто процесорӯв найдете в табулках долӯв.

Десктоповы процесоры си можете купити на інтернетови уже днись.

Нові материнські платы, нові чіпсеты

Попиля процесорӯв Intel понукавут нам ай платформы на тото вшытко. Выробникы материнськых плат типирька будут мати три нові варіанты чіпсетӯв серії 600: H670, B660, тай H610. Исе в додачу ид перич презентованӯв Z690. Понятноє дїло ож тоты три будут мати менше можности, менше доступных портӯв, як Z690, но при тӯм ушыткі будут мати основні стандарты, гикой Wi-Fi 6E тай PCIe 4.0. Бӯлше інформації за нї найдете в табулци пониже.

Мобілні процесоры Alder Lake

Ипен таку гібридну архітектуру будут мати ай мобілні процесоры нового колїна уд Intel. У первӯм шорови маєме силні процесоры серії H, из релатівно читавов спотребов світла, аж до 45 Ват. Ушыткі процесоры серії будут мати ядра убодвох типӯв, як моцні, тай ефектівні.

Intel ся бизувут ож нові мобілні процесоры Alder Lake, а май конкретно флаґман Core i9-12900HK из повысшеными частотами онь до 5 ґіґагерц, будут валовшні перескакати свойих основных конкурентӯв, а тото сут ипен AMD Ryzen 5900HX тай Apple M1 Max, як у бавках, тай ай у простӯй роботї. Фірма Intel бизує ся, ож йих новый процесор Core i9-12900HK буде на 28% май силный выд свого "старшого брата" — Core i9-11980HK. У подакотрых сінтетічных тестах, гикой PurgeBench Premiere Pro, новый чіп убганят старші моделі онь на 44%, но туй варта тямити, ож говориме не за майновый софтвер, та реалні цифры в будучности, а главной у новых бавках, не будут аж такі читаві.

Кроме чистої силы у цифрах, дӯстанеме ай пуддержку новых стандартӯв тай інтерфейсӯв (ненарочна фіґля), такых ги Wi-Fi 6e, Thunderbolt 4, PCIe 4.0, DDR5 тай LPDDR5 (аж до 5200 меґагерц). Но при тӯм не буде пуддержкы PCIe 5.0, а стандарт HDMI буде фунґовати лишек до HDMI 2.0b.

Перві новтбукы колїня Alder Lake найдеме на торгови у первӯм кварталі рока 2022.

Кроме того не забыли Intel ай за май дешевый сеґмент, де тоже найдеме нові процесоры на платформі Alder Lake из ідентіфікатором P, што будут мати спотребу світла 25 Ват, тай из ідентіфікатором U из спотребов 15 тай 9 Ват. Спеціфікації сих найдете пониже, но Intel ся грозили же продавати ся они зачнут пак май.

Діскретна ґрафіка Intel Arc

Но тай накурто нам уповіли ай за довго чекані десктопові ґрафічні карты — Intel Arc. Фірма Intel каже ож уже зачала заганяти перві чіпы Alchemist выробникам десктоповых компютерів, та уже скоро найдеме на торгови ай такоє. Нову ґрафіку уд Intel будеме видїти у готовых десктоповыї рїшіньох уд Acer, Asus, Clevo, Dell, Gigabyte, Haier, HP, Lenovo, Samsung, MSI, NEC.

Нові ґрафічні процесоры мали бы дӯстати пуддержку цїлого шора новых технолоґій, спомежи котрых пожеме спомнити за апаратну пуддержку трасованя променюв XeSS. Но раз Intel не пилувут удкрывати ушыткі детайлы за испис технолоґій тай спеціфікацій, цїн новых карт.

Жерело: ITC.UA

Читайте нас на Twitter тай Telegram