Twitter ся продає Ілону Маску

Тото буде стойити заложительови Tesla, SpaceX, The Boring Company $44 міліарды.

Історія из Twitter тай Ілоном Маском дӯстає продовжиня.

У новому пресрелізови у Twitter обявили, ож такы продадут ся Ілону Маску по цїнї $54.20 за акцію — иппен сяку суму называв Маск 14. апріля у свою‌в зачатковӯв понуцї.

«Слобода слова вто основа функціонувучої демократії» — уповів міліардер, — «a Twitter є тов ціфровов городськов площов, на котрӯв обговорювут ся крітично важні про будучноє людства звіданя. Я хочу вылїпшити Twitter новыми функціями, удпертьом зачаткового кода алґорітмӯв, обы пӯдняти уровинь довіры, борьбов из спам-ботами тай автентіфікаційов ушыткых люди».

CEO Twitter Параґ Аґравал у сьому иппен пресрелізови поґратуловав Маска тай уд себе додав: «Twitter має цїль тай релевантнӯсть, котрі мавут ефект на ушыткый світ. Дуже-м гордый за наші команды тай іншпірованый им нашов роботов, котра щи ниґда не была таков важнов».

На зачаткову понуку Ілона Маска купити Twitter рада діректорӯв компанії удповіла удказом, узявши ся за тактику «отровної таблеткы». Айбо май потӯм компанія передумала — не знаєме, які были причины на сякый рїзкый розворот на 180°.

Жерело: The Verge

Читайте нас на Twitter тай Telegram