"Шўртан ГКМ" МЧЖ: Газларни ажратиш қурилмаси фильтридаги фаоллаштирилган кўмир янгисига алмаштирилди
"Шўртан газ кимё мажмуаси" МЧЖда ишлаб чиқариш барқарорлигини таъминлаш мақсадида ишлаб чиқилган йиллик чора-тадбирлари режасига асосан Этилен ишлаб чиқариш цехининг газларни ажратиш қурилмаси фильтрида фаоллаштирилган кўмирни янгисига алмаштириш ишлари олиб борилди.
Газларни ажратиш қурилмаси фильтридаги фаоллаштирилган кўмир кимёвий реагенти бир йилда уч марта яъни ҳар тўрт ойда бир марта алмаштирилиши белгиланган бўлиб, жорий йилнинг март ойида дастлабки бор алмаштириш ишлари амалга оширилган эди.
Ушбу фильтрнинг вазифаси фаоллаштирилган кўмир кимёвий реагенти ёрдамида юқори ҳароратда диэтаноламин таркибидаги эритманинг парчаланиши натижасида ҳосил бўладиган маҳсулотлар, иссиққа бардошли тузлар, коррозия маҳсулотлари ва полимерларни ушлаб қолишдан иборат.
Агар юқоридаги жараён фильтр ёрдамида амалга оширилмаса, диэтаноламин эритмасинининг нордон газларни ютиш самарадорлиги тушиб кетади ва натижада ишлаб чиқариш самарадорлигининг пасайишига олиб келади.
Маълумот учун, Шўртан газ кимё мажмуаси Этилен ишлаб чиқариш цехи 2000 йилнинг 01 апрель санасида ташкил топган бўлиб, ҳар йили Шўртан нефть ва газ қазиб чиқариш бошқармаси конларидан келадиган 4 млрд. м3 табиий газни қайта ишлаб, ундан 3.4 млрд. м3 метан ёқилғи гази, 100 минг тонна суюлтирилган газ, 100 минг тонна газ конденсати, 1000 тонна олтингугурт ишлаб чиқаради.