"Шўртан ГКМ" МЧЖ: Полиэтилен ишлаб чиқариш цехининг Реакция қурилмасидаги кимёвий реагентлар янгисига алмаштирилди
Жорий йилнинг 3 июль куни "Шўртан газ кимё мажмуаси" МЧЖда Полиэтилен ишлаб чиқариш цехининг Реакция қурилмасидаги циклогексан кимёвий реагентини тозалаш аппаратида, силикагель ва алюминий оксиди кимёвий реагентларини алмаштириш ишлари олиб борилди.
Мажмуада ишлаб чиқариш барқарорлигини таъминлаш мақсадида ишлаб чиқилган йиллик чора-тадбирлари режасига асосан ушбу реакция қурилмасидаги циклогексан кимёвий реагентини тозалаш аппаратида, силикагель ва алюминий оксиди кимёвий реагентлари бир йилда икки марта яъни ҳар олти ойда бир марта алмаштирилиши белгиланган бўлиб, жорий йилнинг феврал ойида дастлабки бор алмаштириш ишлари амалга оширилган эди.
Циклогексан кимёвий реагентини тозалаш аппаратининг вазифаси "Sсlairtech" технологияси асосида циклогексан реагентининг таркибидаги кетон ва намликларни тутиб қолишдан иборатдир. Бунинг учун Силикагель, Алюминий оксиди ва кичик ўлчамлардаги керамик шарлар кетма-кет қатламлар ҳолатида аппаратга юкланади. Агарда кетон ва намликлар технологик жараёнда ушлаб қолинмаса, бу ҳолат полиэтилен ишлаб чиқариш жараёнида иштирок этадиган қимматбаҳо катализаторларнинг меъёрий сарфларини ошишига олиб келиб, ишлаб чиқариш самарадорлигига салбий таъсир кўрсатади.
Ушбу аппарат учун кимёвий реагентлар бугунги кунгача турли чет давлатлардан олиб келинади. Хусусан, Циклогексан кимёвий реагенти Россия давлатидан олиб келинса Алюминий оксиди кимёвий реагенти Канада давлатидан келтирилади. Ушбу кимёвий реагентларни етказиб келтириш одатда жуда қийин ва узоқ муддат талаб этади. Охирги йилларда мажмуада олиб борилаётган маҳаллийлаштириш дастурига асосан кимёвий реагентларнинг маълум бир қисми, хусусан 6 мм, 12 ва 20 мм ўлчамдаги керамик шарлар Тошкент шаҳрида жойлашган Қуёш физикаси илмий текшириш институти томонидан етказиб берилмоқда.
Маълумот учун, Полиэтилен ишлаб чиқариш цехида жойлашган реакция қурилмасининг циклогексан кимёвий реагентини тозалаш аппарати 1999 йилда Япониянинг йирик "TOYO Enjinering" компанияси томонидан лойиҳаланган ва ишлаб чиқарилган бўлиб, 2000 йилда мажмуага олиб келтирилган ва ўрнатилган.