"Шўртан газ кимё мажмуаси" МЧЖда янги спорт мажмуаси фойдаланишга топширилди
Соғлом турмуш тарзини тарғиб қилиш, оммавий спорт турларини ривожлантириш, қолаверса цех, хизмат, тармоқ ва бўлимлараро жамоавий муҳитни янада яхшилаш, ходимларнинг спорт соҳасидаги қобилиятини намоён қилишлари учун зарур шарт-шароитлар яратиш мақсадида мажмуа ишчи-ходимлари учун янги спорт мажмуаси қурилиб, фойдаланишга топширилди.
Спорт мажмуаси волейбол ва сунъий қопламали мини футбол майдонидан иборат бўлиб, ҳозирги замон талабига мос равишда барпо этилди.
Мазкур спорт иншоотининг тантанали очилиш маросимида “Шўртан газ кимё мажмуаси” МЧЖ Бош директори Шухрат Асланов сўзга чиқиб, мажмуада спортга бўлган эътибор ҳамда ишчи-ходимларни спорт соҳасида эришаётган ютуқлари тўғрисида тўхталиб ўтган ҳолда, янги спорт масканининг очилиши билан барчани муборакбод этди.
Тантанали очилиш маросимидан сўнг мажмуада фаолият юритаётган аёллар ва эркаклар ўртасида спортнинг волейбол тури бўйича мусобақалар ўтказилиб, якунда мусобақа қатнашчиларига мажмуа маъмурияти ва касаба уюшма қўмитаси томонидан эсдалик совғалари топширилди.
