KPI - samaradorlikni oshirish va strategik maqsadlarga erishishda muhim vosita
“O‘zbekneftgaz” AJ tarkibidagi korxonalarda samaradorlikning muhim ko‘rsatkichlari (KPI) tizimini joriy etishga bag‘ishlangan taqdimotlar o‘tkazilmoqda.
HR departamenti mutaxassislari tomonidan Buxoro neftni qayta ishlash zavodi, “Uzbekistan GTL” hamda Sho‘rtan gaz kimyo majmuasida o‘tkazilgan seminarlarda korxona rahbariyati, yetakchi muhandislar, xizmat va bo‘lim boshliqlari ishtirok etdi.
Taqdimot doirasida KPIni joriy etishning maqsad va tamoyillari, uning xodimlar motivatsiyasini oshirish, mehnatni baholashning samarali tizimini shakllantirishdagi roli haqida batafsil tushuntirib berildi.
Ishtirokchilarga asosiy ko‘rsatkichlarni to‘g‘ri ishlab chiqish usullari va ularni tanlashda ishlab chiqarish jarayoni, xom ashyo sarfi, mehnat unumdorligi va boshqa ko‘rsatkichlar haqida ma’lumotlar berildi.
Seminarlarda ushbu tizimning xodimlardagi motivatsiyani oshirishdagi roliga alohida e’tibor qaratildi. Tizim orqali korxona o‘zining ishlab chiqarish, moliyaviy va boshqaruv faoliyatidagi natijalarni to‘g‘ri baholash va ularni strategik maqsadlarga muvofiq ravishda ishlab chiqish imkoniyatiga ega bo‘ladi.
Ochiq muloqot tarzida o‘tkazilgan tadbirlarda mutaxassislar o‘zlarini qiziqtirgan savollarga javob olishdi va tizimni ishlab chiqarish faoliyatida qo‘llashning amaliy jihatlarini muhokama qilishdi.
