“Ўзбекнефтгаз” АЖ 29-Боку халқаро энергетика ҳафталигида иштирок этмоқда
Шу кунларда Боку шаҳрида Озарбайжон Республикаси Энегетика вазирлиги ҳамда “SOCAR” компанияси ҳамкорлигида Каспий минтақасида энергетика соҳасидаги энг йирик тадбир Энергетика ҳафталиги бўлиб ўтмоқда.
Мазкур ҳафталик энергетика соҳасининг учта энг йирик тадбирларини ўз ичига олади. Яъни 29-халқаро "Каспий нефт ва газ" кўргазмаси, 12-Каспий энергия ва яшил энергия халқаро кўргазмаси ва 29-Боку энергетика форуми.
4 июнь куни тадбирнинг расмий очилиш маросими ўтказилиб, унда Озарбайжон Республикаси Президенти Илхом Алиев кириш сўзи билан иштирок этди.
Тадбирда шунингдек, Туркия, Саудия Арабистони, БАА, Австрия, Белгия, Бахрейн, Буюк Британия, Венгрия, АҚШ, Полша, Ироқ, Словения, Жазоир каби давлатлардан келган расмий делегациялар вакиллари, шунингдек Халқаро нефт экспорт қилувчи мамлакатлар ташкилоти (ОПЕК), Халқаро энергетика агентлиги, Газ экспорт қилувчи мамлакатлар форуми, Қайта тикланадиган энергия манбалари халқаро агентлиги, Халқаро энергетика хартияси каби ташкилотлар раҳбарлари ҳам иштирок этмоқда.
Кўргазмага ташрифи давомида Озарбайжон Республикаси Президенти Илҳом Алиев “Ўзбекнефтгаз” АЖ корпоратив стенди билан ҳам яқиндан танишди. Юқори мартабали меҳмонга “Ўзбекнефтгаз” АЖ томонидан Озарбайжон компаниялари билан ҳамкорликда амалга оширилаётган ва режалаштирилган инвестиция лойиҳалари, истиқболли режалар ҳақида батафсил маълумотлар берилди.
Боку энергетика ҳафталиги давомида нефт ва газ йўналишида амалга оширилиши мумкин бўлган истиқболли лойиҳалар, нефт ва газ конларини ўзлаштириш, қазиб олиш, қайта ишлаш ва ташиш, ахборот технологиялари имкониятларидан самарали фойдаланиш, янги инновацион ечимларни тадбиқ этиш, саноат кооперацияси алоқаларини йўлга қўйиш ва кенгайтириш каби йўналишларда “B2B” ҳамда “B2G” форматларидаги учрашув ва музокаралар ўтказилиши ҳам режалаштирилган.
