“Ўзбекнефтгаз” АЖ рейтингида ижобий ўсиш — S&P прогнозни яхшилади
“S&P Global Ratings” халқаро рейтинг агентлиги “Ўзбекнефтгаз” АЖнинг кредит рейтинги бўйича прогнозини “Барқарор”дан “Ижобий”га ўзгартирди ва компаниянинг узоқ муддатли кредит рейтингини ‘Б+’ даражасида тасдиқлади. Ушбу қарор 2025 йил 23 май куни Ўзбекистон Республикаси суверен кредит рейтинги бўйича прогноз қайта кўриб чиқилишига мос равишда қабул қилинди.
Маълумки, “Ўзбекнефтгаз” АЖ мамлакат иқтисодиётида стратегик аҳамият касб этади. Компания республикада табиий газ қазиб чиқаришнинг тахминан 60 фоизини таъминлайди ва уни ижтимоий нархларда ички бозорга етказиб бериб, саноатни ривожлантириш ва энергетика соҳасида барқарорликни таъминлашга ҳисса қўшиб келмоқда. Шунингдек, компания маҳаллий газ асосида “GTL” заводида синтетик ёқилғи ва бошқа чуқур қайта ишланган маҳсулотларни ишлаб чиқаради. “Ўзбекнефтгаз” АЖ ва унинг таркибига кирувчи корхоналар мамлакатдаги учта энг йирик солиқ тўловчилар қаторига киради.
Компания акцияларининг деярли 100 фоизи давлатга тегишли, кузатув кенгашида ҳам давлатнинг салмоқли иштироки мавжуд. Ўтган йиллар давомида давлат компанияни имтиёзли шартларда ва давлат кафолати асосида кредит кўринишида қўллаб-қувватлаб келган.
Ижобий прогноз келгусида рейтинг ошиши эҳтимолини акс эттиради. Бу эса суверен рейтинг яхшиланган тақдирда ёки компаниянинг молиявий кўрсаткичлари, жумладан ликвидлик ва операсион фаолиятдан тушумнинг қарзга нисбати яхшиланганда юзага келиши мумкин.