“Ўзбекнефтгаз”: Январь-февраль ойларида полиэтилен ва саноат хизматлари экспортда асосий улушни ташкил қилди
“Ўзбекнефтгаз” АЖ томонидан тизимда олиб борилаётган ислоҳотлар жамият тасаруффидаги бошқармалар ва заводларда ишлаб чиқарилаётган бирламчи ҳамда иккиламчи маҳсулотларни нафақат республика ичида сотилишини, балки ташқи бозорга экспорт қилинишининг ошишига ҳам олиб келмоқда.
Ўзбекистон Республикаси Президенти қарорига асосан 2023 йил январь-февраль ойларида "Ўзбекнефтгаз" АЖ учун белгиланган мақсадли экспорт кўрсаткичлари прогнози 48,6 млн АҚШ долларини ташкил этиб, амалда ушбу кўрсаткич 57,0 млн АҚШ долларига етказилди ва белгиланган режа 117,3 фоизга бажарилди.
“Ўзбекнефтгаз” АЖ Тижорат департаментининг маълумотига кўра, жамият экспорти таркибида полиэтилен (53%) ва саноат хизматлари (17%) асосий улушни ташкил қилди. Шунингдек 15,0 минг тонна миқдоридаги, “Uzbekistan GTL” заводида ишлаб чиқарилаётган синтетик нафта маҳсулоти экспортга йўналтирилди.
Бугунги кунда “Ўзбекнефтгаз” АЖ маҳсулотлари дунёнинг 18 та давлатига экспорт қилинмоқда. Жумладан Туркия, Латвия, Афғонистон, БАА, Хитой ва Россия давлатлари “Ўзбекнефтгаз” АЖнинг асосий экспорт ҳамкорлари ҳисобланади.
“Ўзбекнефтгаз” АЖ томонидан янги экспорт бозорларини ўзлаштириши ҳамда фаол маркетинг сиёсати давом эттирилади. Амалга оширилиши режалаштирилган чора-тадбирлар натижасида жорий йил I чораги якуни билан 81,5 млн АҚШ доллари миқдоридаги маҳсулот ва хизматлар экспорт қилиниши ва экспорт мақсадли кўрсаткичлари 108,0 фоизга бажарилиши кутилмоқда.
Таъкидлаш жоизки, “Uzbekistan GTL” заводи томонидан ишлаб чиқарилган синтетик дизелни экспорт қилиш учун энг яхши таклиф бўйича саралаш танлови эълон қилинди. Танловга кўра, “Uzbekistan GTL” заводида ишлаб чиқарилган 200,0 минг тонна синтетик дизель ёнилғисини “FCA Free Carrier” (Incoterms 2020) шартлари асосида, ҳар бир лоти учун 100,0 минг тонна миқдорда этиб белгиланган. Таклифларни топшириш учун охирги муддат – 2023 йил 25 март куни соат 15:00 (GMT +5).
Танлов ҳақидаги батафсил маълумотлар билан ушбу ҳавола орқали танишиш мумкин: https://www.uzgtl.com/competition.