АҚШ элчиси: Манфаатли алоқалар давлатларимиз ўртасидаги барқарор шерикликнинг ёрқин мисолидир
Америка Қўшма Штатларининг мамлакатимиздаги Фавқулодда ва Мухтор Элчиси Жонатан Хеник “Uzbekistan GTL” заводига ташриф буюрди.
Мартабали меҳмон бошчилигидаги делегация аъзоларига синтетик ёқилғи маҳсулотлари ишлаб чиқарилишининг жорий ҳолати, сифат стандартларга мувофиқлиги, маркетинг тизими ҳақида батафсил маълумот берилди. Мутахассислар томонидан АҚШнинг илғор компаниялари билан ҳамкорликда режалаштирилаётган истиқболли лойиҳалар ҳақида тақдимот ўтказилди.
Бундан ташқари, заводнинг замонавий бошқарув панеллари орқали асосий ускуналар ва ишлаб чиқариш қурилмаларини синхрон эксплуатация қилиш технологик тизими ҳақида атрофлича сўзлаб берилди.
Мулоқотда заводнинг инвестор ҳамкори, АҚШнинг “Air Products” компанияси билан олиб борилаётган икки томонлама алоқалар бўйича ҳам сўз борди.
Ташриф сўнгида Жонатан Хеник ушбу йирик лойиҳа доирасида йўлга қўйилган ўзаро манфаатли алоқалар икки давлат ўртасидаги узоқ муддатли ва барқарор шерикликнинг яққол мисоли эканлигини қайд этди.